نسمة تطلب الخلع: "كان بيحط وشي تحت جزمته"

" ايديه سابقه لسانه ميعرفش يعنى تفاهم وعشرة بالمعروف، على اتفه سبب يضرب ويتعصب لدرجة إنه بيحط وشي تحت جزمته، عشان يخلينى أحس بالإهانة، وكنت فى أول الجواز جبانة أخاف أتكلم أو أحكي لأهلي اللى بيحصل عشان المشاكل، لحد ما بقى يستقوى عليا، وصلني في مرة إني أفكر فى الانتحار" بهذه الكلمات لخصت نسمة معاناتها وهي داخل محكمة الأسرة لرفع دعوى خلع من زوجها بعد عام ونصف من الزواج مبررة استحالة العشرة معه.

وروت الزوجة قصتها لـ "أهل مصر" قائلة: "اتجوزت من سنة ونص بعد علاقة عاطفية استمرت أشهر قليلة، كنت فاكرة إني هعيش أجمل أيام في حياتى معاه، لكن للأسف بعد الجواز اتغير بطريقة بشعة، ويتعصب عليا في أقل حاجة لدرجة إنه لو طلب شاي وأتاخرت عليه شوية ألاقيه قام ضربني وغلط فيا ويجيب وشي تحت جزمته، كانت حياتي جحيم بمعنى الكلمة، بقيت بترعب منه بخاف أعمل أي حاجة ليغضب عليا، وكمان كان أوقات كتير بيهني قدام والدته، كنت بحس إني الخدامة أحسن مني وعندها كرامة عني، لكن أنا كنت بسكت فى البداية عشان بحبه لحد ما قلبي قسي عليه، وكنت بتحمل كل اللى بيعمله عشان جبانة وخايفة من المشاكل".

وتابعت حديثها: "لحد ما بقيت أفكر أحيانا في الانتحار وأخلص من حياتي كلها، لحد الحمدلله اتجرأت أخيرا وحكيت لوالدتي اللى استنكرت الوضع نهائيا، وأصرت إنها تحكي لوالدي وأطلق الحمدلله قدرت أرفع دعوى خلع عشان أتخلص من العيشة معاه ومنتظرة حكم القضاء".