'مكنتش أتخيل ان ممكن يعمل كدا فيا وأنا حامل فى الشهر السابع لما اكتشفت انه بيعرف عليا واحدة واتخانقت معاه لكن هو دافع عنها بشكل مش معقول، وكأنها قلبت دماغه ناحيتى بعد ما كان يتمنى لى الرضا، وتحملت وقولت هحاول أرجعه ليا تانى لكن ظنى خاب لما جاب عشيقته فى نص الليل ولما رفضت أدخلها شقتى، طردنى وأنا حامل ودخل بيها جوه الشقة وخليت حد من الجيران وصلنى بيت أهلى'.. جاءت هذه الكلمات على لسان إيناس وهى تطلب الخلع من زوجها بعد عام ونصف فقط من الزواج مبررة استحالة العشرة معه.
وروت الزوجة قصتها لـ'أهل مصر' قائلة: كان بيعشقنى أول ما اتجوزنا لدرجة ان الكل كان بيحسدنى بسبب معاملته معايا، وخاصة انى الحمدلله ربنا كرمنى بقدر من الجمال، وكانت حياتنا مستقرة بشكل كبير لحد ما ربنا أكرمنى وحملت، وفجأة لقيت جوزى بيبعد عنى من غير أى سبب واتأكدت ان ظهرت فى حياته واحدة، وفعلا لما دورت فى الفيس بوك بتاعه اكتشفت انه على علاقة بواحدة مطلقة وعايش معاها، ومتفقين على الجواز لدرجة انها مخلياه زى الخاتم فى صباعها.
وتابعت حديثها: من هنا بدأت الخلافات بينا، وكنت فاكرة انه هيعتذر على اللى عمله لكن اتفاجئت انه بيدافع عنها ومش طايقنى أنا وكأنها عاملة له سحر، وبيجبرنى انى أقبل جوازهم العرفي، ولما رفضت تدخل شقتى لما جابها طردنى أنا وقال لى 'لما تعقلى ابقي ارجعى وطلاق مش هطلق' وأنا خليت حد من الجيران وصلنى لبيت أهلى ورفعت دعوى خلع ومازالت الدعوى منظورة أمام القضاء.
تابعوا آخر أهل مصر على Google News
