صفاء تطلب الخلع: فضحني وقال إني غلطت معاه قبل الزواج

"كنت فاكراه إنسان مخلص وهيقدر حبي ليه، ساعدته أنه يتجوزني واديته فلوس من وراء أهلي عشان غلطنا مع بعض، وكنت فاكره أنه هيفضل سر بيننا لكن للأسف بعد الجواز بكام شهر فضحني، وقال لكل الناس أني رخيصة وسلمته نفسي قبل الجواز، وهو طلع راجل واتجوزني عشان الفضايح، على الرغم أنه عشان يتمم الجواز وميقولش لحد أخد فلوس الجهاز مني، وفي الآخر بيذلني ويضربني"، جاءت هذه الكلمات على لسان صفاء، وهي داخل محكمة الأسرة لرفع دعوى خلع ضد زوجها بعد 10 أشهر من الزواج مؤكدة على استحالة العشرة بينهما.

وقالت الزوجة، خلال حديثها مع "أهل مصر": كنت بحبه جدا من أول يوم خطبني فيه، لدرجة أني كنت بساعده بفلوس من وراء أهلي عشان يشتري هدايا ليا وأكبره في نظرهم، لحد ما كتبنا الكتاب وللأسف غلطت أني روحت معاه بيت أهله في غيابهم لكن مكنتش عارفه أنه ممكن يغلط معايا، لكن للأسف الشيطان شاطر ووقعنا في الغلط، وندمت ومنعته أنه يلمسني تاني غير بعد الجواز، وبقيت أدفع ليه فلوس عشان الفرح وميقولش لحد على اللي حصل وهو وعدني لحد ما اتجوزنا وأخد كل اللي معايا وبدأ يتغير ويضربني".

وتابعت: "دوقني كل أنواع الذل وفضحني، وقال لكل الناس أنى رخيصة وسلمت ليه نفسي حتى أهلي ونزلت في نظر الكل لحد ما فكرت أني انتحر لمن مقدرتش، وقررت أطلق لكن رفض وفضل يذلني، لحد ما قررت أرفع دعوى خلع بمحكمة الأسرة وانتظر أولى الجلسات".