"غلطتى من البداية انى عرفته على صاحبتى المطلقة لكن كنت واثقة فيه جدا وهو كان محسسنى انها زى اخته واستحالة يبص لها لأن عينه مليانة، لكن كان كذاب واستغل سذاجتى انهم يعملوا علاقة من ورايا ويروح شقتها ويبات عندها كمان، لدرجة ان حد شافه وروحت لاقيته بايت فى حضن صاحبتى، ولما واجهته قال انها لحظة ضعف واتجوزها عرفي".. جاءت هذه الكلمات على لسان ندى وهى داخل محكمة الأسرة لرفع دعوى خلع من زوجها بعد عامين ونصف من الزواج مبررة استحالة العشرة معه.
وروت الزوجة قصتها لـ"أهل مصر" قائلة: اتخطبنا صالونات لكن فى فترة الخطوبة قربت منه جدا، واتعلقت بيه كان هو كل حاجة بالنسبة لي وكنت بحس انه هو كمان بيحترمنى ويقدرنى، وكنت بثق فيه بشكل كبير لدرجة ان صاحبتى لما اتطلقت كنت بجيبها البيت عشان نفسيتها، واسيبهم يتكلموا عادى وطلبت منه انه يتكلم معاها عشان نساعدها تخرج من الحالة دى، لكن مكنتش متوقعة انه ممكن يخون ثقتى فيه ويعملوا علاقة من ورايا وهى كمان تخونى، أنا مصدقتش لما حد شافهم مع بعض طالعين شقتها فى نص الليل واتصلت على أخويا عشان أتاكد بعينى.
وتابعت حديثها قائلة: للأسف أول ما وصلنا الشقة اتأكدت انه فعلا عندها من الجزمة بتاعته قدام شقتها وأول ما خبطت بعدت عن عين الباب وخرج هو يفتح واتصدم لما لاقاني أنا وأخويا، قعد يبرر لنفسه انها لحظة ضعف واتجوزها عرفي ومستعد يطلقها حالا بس أسامحه لكن أنا صممت انى اتطلق ورفض، عشان كدا رفعت دعوى خلع بمحكمة الأسرة وانتظر أولى الجلسات.
تابعوا آخر أهل مصر على Google News
