"تعبت جدا من كتر الشك اللى عايشة فيه، من كتر الغلط اللى بيعمله بيتخيل أنى زيه، دائما يتخانق معايا ويتهمنى أنى كل ما بشوف راجل ببص عليه، ويفضل يقول لى انتى تخيلتى انك مارستى العلاقة معاه، ويفضل يضرب فيا، لحد ما يفوق آخر اليوم بعد ساعات ويعتذر، كنت فى الأول بستحمل وأفهمه انه مافيش غيره فى حياتى لحد ما اتعود على إهانتى وبقيت مش قادرة اتحمل أكتر من كدا".. نطقت بهذه الكلمات رشا وهى داخل محكمة الأسرة لرفع دعوى خلع من زوجها بعد عام و6 شهور من الزواج مبررة استحالة العشرة معه.
وروت الزوجة قصتها لـ" أهل مصر" قائلة: اتجوزت من سنة و6 شهور جواز صالونات، لكن بعد الخطوبة اتعلقت بيه، وكنت بحلم باليوم اللى هكون فيه مراته، ومكنتش أعرف انى هعيش فى جحيم بالشكل دا، لما لقيت نفسي بعيش مع إنسان شكاك بشكل مش طبيعي ومفيش أى حاجة تستدعى الشك لكن هو ديما يشك فى كل تصرفاتى ويعلم ربنا ان الكل بيحلف بأخلاقي وأنا كمان براعى ربنا فى بيتى وفيه، لكن اكتشفت انه هو بيعمل كدا عشان كدا خايف يترد فيه اللى بيعمله.
وأضافت: كل شوية يخلق مشكلة ويقول لى انتى كنت بتبصي على جارنا فلان وأكيد بتتخيليه وهو معاكى وبعدها يبدأ وصلة الضرب والإهانة لحد ما يفوق لنفسه ويسيب جسمى كله علامات من ضربه.
وتابعت حديثها قائلة: كنت فى الأول بخاف من فكرة الطلاق جدا، ونظرة الناس وأهلى وبنات العيلة لحد ما جيت على نفسي وأعصابي، وكنت هضيع حياتى كلها بسببهم، وكل مرة اتكلم معاه وافهمه انى براعى ربنا فيه يعتذر لي وميكملش يومين ثلاثة وتطلع خناقة جديدة ونفس الحوار يحصل لحد ما طفح بي الكيل وقررت مهما حصل هطلب الطلاق لكن هو رفض عشان كدا اتشجعت ورفعت دعوى خلع ومازالت الدعوى منظورة أمام القضاء.
تابعوا آخر أهل مصر على Google News
