"كنت فاكرة لما يعرف انى كشفت انه بيكلم واحدة عليا يحس على دمه ويتكسف لكن إنسان عديم الضمير يموت فى الحرام، أول ما واجهته عادى جدا اعترف انها متجوزة ويعرفها من قبل الجواز كمان، وانى ماليش دعوة بأى حاجة تخصه وانى ماليش غير أكلى وشربي فقط، وطالما انه مش مقصر معايا يبقي ماليش حق اتكلم".. جاءت هذه الكلمات على لسان شيرين وهى داخل محكمة الأسرة لرفع دعوى خلع من زوجها بعد ٤ سنوات من الزواج مبررة استحالة العشرة معه.
وقالت الزوجة في مستهل حديثها مع "أهل مصر": من أول ما اتجوزنا وهو بيسهر كتير وكمان أصحابه كلهم مش كويسين، ولما كنت بتكلم معاه كان بيقول لى عادى أنا بحب السهر والخروجات وكنت قبل الجواز وهبقي بعده، وكنت بتحمل عشان خاطر بنتى اللى خلفته منه بعد سنة من الجواز، على أمل ربنا يهديه لكن للأسف زاد أكتر لحد ما ربنا كشف ستره، وشوفت انه على علاقة بواحدة متجوزة وبينهم كلام إباحى وخلافه، وصور لدرجة انهم بيكلموا شات جنسي كتير، وانهرت وواجهته وحصلت مشكلة كبيرة بيننا وهو شايف انه مش غلطان لدرجة اعترف انه على علاقة بيها من قبل الجواز ومش هيقطعها لأن روحه فيها.
وتابعت حديثها قائلة: كان كلامه زى الخنجر ليا وصوتى على عليه وقولت كلام صعب ليه لكن هو مش همه، لحد ما قررت أكلمها من وراه وهددتها انى هخرب بيتها لو مبعدتش عن جوزى، لكن هى قالت له وجه ضربنى لحد ما فتح دماغى، وطردنى ببنتى وسط الليل من شقتى، ولما قولت لأهلى وطلبت الطلاق رفض عشان يذلنى لحد ما رفعت دعوى خلع بمحكمة الأسرة وانتظر أولى الجلسات بالمحكمة.
تابعوا آخر أهل مصر على Google News
