" مش قادرة أتحمل اكتر من كدا، خانى مرتين مع ستات متجوزة، وبينهم احلى كلام رومانسي ودلع دا انا اللى مراته مش بيتهم بيا زيهم، طول اليوم تليفونه مشغول ولما اواجه انه يعرف ستات لما شوفت الشات بتاعه اول مرة أعتذر وطلب انى أسامحة ومش هتكرر تانى، ووافقت فى الأول عشان خاطر ولادى رغم انه عمل معاها علاقة جنسية كاملة، واستحملت لكن هو للأسف مندمش ورجع يلعب من ورايا تانى وعرف واحدة متجوزة تانى وطول اليوم تليفونه مشغول معاها ولما اقوله ليه بتخونى يقول لى" العيب مش منك انا عينى فارغة " جاءت هذه الكلمات على لسان زينب وهى داخل محكمة الأسرة لرفع دعوى خلع من زوجها بعد ٦سنوات من الزواج مبررة استحالة العشرة معه.
وقالت الزوجة في مستهل حديثها مع " أهل مصر" : اتجوزت من ٦ سنين جواز صالونات، ولكن بالعشرة بقيت احبه وربنا كرمنى ب 3 أطفال وحياتنا كانت مستقرة لكن فى الفترة الأخيرة الدنيا اتغيرت بينا شوية لما اكتشفت انه بيخونى مع واحدة متجوزة وحصلت بينهم علاقة جنسية كامله، انهارت لما شوفت كلامهم والشات اللى بينهم وقررت انى اطلق منه لكن فضل يعتذر واقسم انها اخر مرة واستحالة يكررها وانا عشان الولاد اللى بينا وافقت وصدقت انه مش هيكررها لكن طلع كذاب ومكملش شهرين ماشي كويس ورجع لعادته القديمة واتعرف على واحدة متجوزة تانى وبقي يتكلم معاها بالساعات لدرجة انى تليفونه طول الوقت مشغول .
وتابعت حديثها قائلة: وواجهته واعترف انه فعلا ضعف وعرف واحدة ولما قولتله" انا مقصرة معاك فى ايه " رد وقال " مش مقصرة فى حاجة بس دى فراغة عين منى " وفضل يوعد فيا انه هيحاول يبعد عنها لكن انا مقدرتش استحمل اكتر من كدا وطلبت منه الطلاق لكن رفض عشان كدا رفعت دعوى خلع ومنتظرة أولى الجلسات .
تابعوا آخر أهل مصر على Google News
