"هند" تطلب الخلع: "بيخونىي قدام عيني وبيضربني لو اتكلمت"

"من كتر طيبتى معاه بقي يحس إني ضعيفة، ويعمل اللي هو عايزه لدرجة إنه بقي يكلم بنات قدام عيني، ويتغزل في جسمهم، ولو اتكلمت يضربني لحد ما كنت بفقد الوعي عليا من كتر عمايله، ويقولي أخرك خدامة هنا" بهذه الكلمات نطقت هند وهي داخل محكمة الأسرة لرفع دعوى خلع من زوجها بعد ٤ سنوات من الزواج مبررة استحالة العشرة معه.

وروت الزوجة "هند"، قصتها لـ "أهل مصر" قائلة: "من أول ما اتجوزنا وأنا اكتشفت علاقاته النسائية الكتير، وبقيت اتخانق في الأول لكن هو مكنش بيتغير، بل بالعكس كان بيبجح فيا ويمد ايده عليا، وكنت بتحمل عشان خاطر الناس والمجتمع ومفضحش أسرار البيت، لكن كنت غلطانة كنت بضحك على نفسي لدرجة إنه بقي يستقوى عليا ويكلم قدام عيني البنات ويقول كلام إباحي ليهم، وأنا كنت ببقى منهارة قدامه، وأحيانا أقوم اتخانق معاه ألاقيه ضربني وشتمني بأبشع الألفاظ، لدرجة إنه مرة فتح دماغي بسبب بنت".

وتابعت حديثها: "كنت بموت لحد ما حسيت إن حياتى ضاعت بسببه لدرجة إني وصلت أكره ابني الرضيع بسبب تصرفاته وإنه هو أبوه، والحمد لله قررت بعد ما لقيت شغل إني أطلق ولما طلبت الطلاق اتهمني فى شرفي عشان كده رفعت دعوى خلع بمحكمة الأسرة وانتظر أولى الجلسات عشان أبدا أعيش حياتى صح".