لم تتخيل سمر أن تأتى الخيانة من أقرب الناس إليها زوجها وصديقة عمرها التى كانت تقص لها كل أسرارها الخاصة، لدرجة أنها كانت تأتى إليها وتنام معها فى وجود زوجها بحجة أنها منذ طلاقها وهى لا تتحمل كلام أهلها، لتنشأ بين زوجها وصديقتها علاقة فى الخفاء دون علمها، ويقومان بتجهيز أوراقهما للسفر حتى جاء اليوم الذي هربا فيه سويا إلى الخارج، مما جعل الزوجة تقف داخل محكمة الأسرة لرفع دعوى خلع من زوجها بعد ٤ سنوات من الزواج مبررة استحالة العشرة معه.
زواج ٤ سنوات
وروت الزوجة قصتها لـ'أهل مصر' قائلة: 'أنا اتجوزت من اربع سنوات بعد علاقة عاطفية استمرت سنة، وكنت بحبه جدا وماليش غيره فى الدنيا هو وصحبتى اللى كانت فى الوقت دا متجوزة وعلى طول عندنا وكنت بثق فيها ثقة عمياء، على الرغم من تحذيرات والدتى دايما لى انى مدخلش حد بيتى، لكن كنت طيبة ومصدقتش انهم ممكن يخدعونى بالشكل دا، لحد ما صاحبتى دى اتطلقت وكانت حالتها النفسية مش كويسة ووقفت جنبها وساعدتها، وكنت بخليها تيجى الشقة دايما عندى وتبات معايا على الرغم من وجود جوزى، لحد ما اتعرفوا على بعض وقربوا من بعض وأنا مش حاسة بحاجة غير فى اليوم المشئوم اللى اكتشفت كل الحكاية.
رفع دعوى الخلع
وتابعت حديثها: كانت بايتة عندى فى اليوم ده هى وسهرنا وفجأة نمت محستش بنفسي غير الصبح مالقيتش صاحبتى ولا جوزى ولا هدومه ولا أى حاجة متعلقة بيه، وأخد كل حاجة ليه حتى الشقة باعها من ورايا وساب لي جواب كاتب فيه 'أنا سافرت الكويت واتجوزت صاحبتك ولو حابه تعيشي معانا هبعتلك لو مش حابة خليكى معلقة وطلاق مش هطلق'، الجواب كان صدمة بالنسبة لي ازاى هونت عليه بالشكل دا، وقررت انى أول حاجة أرفع دعوى خلع ومنتظرة أولى الجلسات.واختتمت كلامها بقولها 'عمرى ما هسامح حد فيهم دمروا حياتى ونفسيتى وبقيت اشك فى صوابع ايديا'.
تابعوا آخر أهل مصر على Google News
