"متجوزة شخص بارد جدا فى أحاسيسه طول الوقت يتعامل ببرود فى المشاعر، حتى العلاقة الزوجية بينا بقت روتينية بشكل ممل لدرجة اني كرهتها ومبقتش قادرة أقرب منه أو أخليه يتعامل معايا، ومش بس العلاقة حتى الكلام اليومى مش بيجذبنى فيه بتخنق لو اتكلمت معاه، ودا مش رأيى أنا بس، دا كل اللى بيتعامل معاه بيزهق من تصرفاته".. جاءت هذه الكلمات على لسان نهى وهى داخل محكمة الأسرة لرفع دعوى خلع من زوجها بعد عام ونصف فقط من الزواج مبررة استحالة العشرة معه.
وقالت الزوجة فى مستهل حديثها مع "أهل مصر": أنا اتجوزت من سنة ونص جواز صالونات وكان مسافر برة مصر طول فترة الخطوبة والكلام كان قليل بينا جدا، ولما نزل على طول خلص شغله بره وفتح مشروع فى مصر واتجوزنا على طول، تقريبا مكنتش أعرف صفاته أو عيوبه عن قريب، إلا لما قربت منه واتجوزنا ولقيت نفسي مع شخص لا يطاق بالمرة، كل حاجة فيه استحالة حد يقدر يعيش معاه، وخوفت من كلام الناس وفكرة الطلاق قررت أتحمل وأحاول أتأقلم مع عيوبه وخاصة البرود فى المشاعر، وتصرفاته مع الناس اللى ديما بيحسسنى بالحرج قدامهم من كتر عدم الاهتمام ليهم، ممكن يزور حد ميفكرش يأخد زيارة معاه، ولو اتكلمت معاه يسمع وميردش ولا يتغير، ومرت الأيام والشهور وأنا عايشة معاه بجسمى بس وكاره كل لحظة معاه.
وتابعت حديثها قائلة: لكن من كتر الكبت حسيت انى هنفجر بقيت مش مستحملة يقرب منى، كرهت العلاقة الحميمة معاه، لدرجة انى عروسة جديدة وبقالى 7 شهور مش بيقرب منى والغريبة أنى مش حاسة بالذنب تجاهه، لدرجة أنى بقيت أحب الشقة لما يخرج هو، وكمان تريقة الناس عليه خليتنى أقرر انفصل فعلا بعد صراع طويل بين عقلى ونظرة المجتمع وطلبت منه يطلقنى، لكن رفض قررت أرفع دعوى خلع ومازالت الدعوى منظورة أمام القضاء.
تابعوا آخر أهل مصر على Google News
