منال تطلب الخلع: طردني من البيت عشان رفضت إن أخوه يشوف هدومي

تقف منال البالغة من العمر ٢٤ عاما فقط داخل محكمة الأسرة بزنانيري، وسط عدد من السيدات ترتدي جاكت أسود من الجلد وبنطلون وتغطي شعرها بحجاب، تنتظر دورها لرفع دعوى خلع من زوجها بعد 11 شهرا فقط من الزواج، مبررة ذلك بقولها: 'ماشي وراء كلام أمه، بيخاف يشتري ولا يعمل حاجة من وراها حتى القرار ميعرفش ياخدها وكل دا وأنا متقبلة ومعترضتش، لكن أخوه اللي في الدبلوم يطلع مع أمه شقتنا ويقعد يتفرج على قمصان النوم بتاعتي في الدولاب ولما أعترض وأطلب منه يمنع أخوه يدخل أوضة نومنا، يتعصب عليا لدرجة انه يطردني من البيت بناء على توجيهات والدته، ويقول لي هتفضلي معلقة وهترجعي البيت بشروطي خدامة ليا ولأمب وأخويا'.

11 شهرا من الزواج

وروت الزوجة قصتها لـ 'أهل مصر' قائلة: 'كنت لسه بدرس لما اتقدم ليا وكان عنده 18 سنة وكان بيشتغل في شركة وشافني في فرح وبعدها اتخطبنا وكان في فترة الخطوبة زي البلسم مالوش صوت، لحد ما قررت والدته اننا نتجوز وأكمل دراستي عنده عشان هي نفسها تفرح به، وأهلي وافقوا واتجوزنا في شقة عند بيت أهله واخواته البنات كلهم متجوزين ومفيش غير ولد واحد في الدبلوم ودلوعة أمه، محدش يقدر يتكلم معاه، وبعد الجواز لقيت جوزي مالوش أي رأي في حاجة حماتي تقرر هو ينفذ بس حتى في الأكل الشرب كل حاجة، لدرجة أن زيارتي لأهلي هي اللى تحددها، وكنت بتحمل وأحاول أتأقلم معاهم، على الرغم أني فكرت من جوايا كتير في الطلاق، لكن زي أي ست مصرية لازم أتحمل وأصبر.

دعوى الخلع

وتابعت: 'لكن كنت بضايق جدا من أخوه لما يطلع مع والدته عندنا يسيبنا في الصالون ويدخل أوضة نومنا، ويتفرج على الدولاب شوفته بيقلب في هدوم النوم بتاعتي، وكل مرة على كده، واتكلمت مع جوزي أن كده ميصحش ومينفعش يدخل أوضة نومي، كنت فاكراه هيغير، لكن راح كلم أمه وقالها وقلبته عليا أني عايزة أفرق بينهم، وهو طبعا طلع واتخانق معايا وشتمنب وغلط فيا وفي أهلي، وطردني بره الشقة عشان أتعلم أتكلم عند أهله ازاي، وقالي لما تتعلمي الأدب هرجعك بشروطي، عشان كده حتى الطلاق مطلبتوش وقررت أرفع دعوى خلع عشان يبقي مخلوع ومازالت الدعوى منظورة أمام القضاء'.