سمر فى دعوى خلع: بلطجي بيرفع عليا السكينة ومرة دخلت فى غيبوبة

"ميعرفش يتفاهم من غير ضرب أو رفع سكينة من يوم ما اتجوزت وأنا عايشة فى رعب، بسبب انه بيضربنى على أتفه الأسباب ويرفع السكينة عليا ويهددنى بالقتل، لدرجة انه فى مرة خبطنى فى الحيطة دخلت فى غيبوبة ولما فوقت لقيته قال لأهلى انى وقعت من على السلم لكن كذبته وقررت انفصل عنه عشان اتأكدت ان المرة الجاية هموت على إيده".. نطقت بهذه الكلمات سمر وهى داخل محكمة الأسرة لرفع دعوى خلع من زوجها بعد عامين من الزواج مبررة استحالة العشرة معه .

وقالت الزوجة في مستهل حديثها مع "أهل مصر": أنا اتجوزت من سنتين كانوا بالنسبة لي حجيم مش جواز، لقيتنى عايشة مع واحد بلطجى، أى خناقة يضرب فيا وكأنه واحد راجل مش مراته لدرجة انه بيرفع عليا السكينة، وبيهددنى بالقتل أو يشوه وشي، على الرغم ان ممكن المشكلة تكون عشان طلبت منه فلوس أكل او أخرج عند والدتى، وكنت عايشة فى رعب وكمان ممنوع أحكى أو أتكلم مع أهلى فى أى حاجة كنت كاتمة جوه نفسى وساكته وبقول نصيب ربنا يهديه، لكن هو زاد فيها وبقي يستقوى عليا بشكل بشع.

وتابعت حديثها قائلة: فى مرة اتخانق معايا عشان اتأخرت فى تجهيز الأكل وفضل يضرب فيا لحد ما خبطنى فى الحيطة أغمى عليا ودخلت فى غيبوبة، وفضلت فى المستشفى فترة لحد ما فوقت، واكتشفت انه قال انى وقعت على السلم، لكن أنا خوفت منه وطلبت الطلاق على الرغم انه وعدنى مش هتتكرر تانى بس هو كذاب عشان كدا رفعت دعوى خلع بمحكمة الأسرة ومازالت الدعوى منظورة أمام القضاء.