"معرفش ازاى اتغير كدا من فترة الخطوبة لإنسان تانى كل حياته حرام فى حرام، بيشرب مخدرات وكل يوم فى علاقة مع ست غير الضرب والذل والإهانة ليا على أى حاجة، وبقي يضربنى قدام اى حد حتى أهله، كان منعنى من كل حاجة انى امسك تليفون او اخرج لأى مكان ولو طلبت أخرج يتهمنى انى على علاقة بواحد ورايحة اقابله، ولما أتكلم معاه يقول لى انتى عايشة مع شيطان حاسبي على نفسك" جاءت هذه الكلمات على لسان وفاء وهى داخل محكمة الأسرة لرفع دعوى خلع من زوجها بعد عام فقط من الزواج مبررة استحالة العشرة معه.
وروت الزوجة قصتها لـ "أهل مصر": "انا متجوزة من سنة واحدة، ويارتنى ما اتجوزت اكتشفت انى دخلت الجحيم برجلى من معاملته السيئة ليا، الزواج كان صالونات وفى الخطوبة كان شخص كويس ويتظاهر بالأخلاق وانا واهلى اتخدعنا فيه، واكتشفنا حقيقته لما بقيت معاه تحت سقف بيت واحد، واتجوزنا بقي إنسان تانى يشرب مخدرات وحشيش عادى فى البيت، كل شوية الاقيه بيكلم بنات على النت، وعلاقات إباحية على التليفون، ولما واجه يقول لى هى دى حياتى ومش هغيرها عشان تريحى نفسك" .
وتابعت: "وعلى الرغم من كل تصرفاته لكن معايا انا ممنوع اعمل اى حاجة سواء خروج او اتكلم فى تليفون حتى لو اهلى اكلمهم وافتح السماعة الخارجية عشان يسمع، ولو طلبت منه اخرج أروح لأمى لوحدى يتهمنى انه على علاقة بحد ورايحه اقابله، دا غير الضرب والإهانة، واللى فهمته انه عايز واحده يقفل عليها وتبقى مراته الشريفة قدامه الناس، لكن هو يعمل اللى عايزة براحته.
وأكملت وفاء: "كنت بموت من القهر وانا بسمعه بيكلم بنات طوال الليل، لحد ما طفح بي الكيل وطلبت منه الطلاق لكن هو رفض وضربنى وسابنى وخرج للشغل، والطبيعى انه قفل عليا الباب، وخبطت على الباب لحد ما الجيران سمعونى وخليتهم يتصلوا على رقم والدى وطلبوا منه انه يجى ليا وفعلا وصل هو واخواتى وعرفوا يفتحوا الباب وخدونى معاهم بعد ما لقوا جسمى كله كدمات من أثر الضرب، ورفعت دعوى خلع بمحكمة الأسرة ومازالتالدعوى منظورة امام القضاء".
تابعوا آخر أهل مصر على Google News
