"والدى راجل محترم وطيب وربنا كرمه اننا كلنا بنات وهو حالته المادية ميسورة عشان كدا قرر يساعد أى عريس يتقدم لينا بشقة نتجوز فيها بشرط انها بتكتب باسم والدى خوفا من المستقبل، وفعلا أنا جوزى لما اتقدم كانت حالته المادية كويسة وعلى الرغم من كدا والدى أصر نتجوز فى شقة اشتراها لينا، عشان يوفر عليه الإيجار، لكن جوزى طلع مش راجل وطماع منتظر ان والدى يأكله ويشربه بعد الجواز، سنة ونص جواز مكنش بيسيب فلوس فى البيت وأنا اللى بصرف من أهلى" نطقت بهذه الكلمات أسماء وهى داخل محكمة الأسرة لرفع دعوى خلع من زوجها بعد عام ونصف من الزواج مبررة استحالة العشرة معه.
وروت الزوجة قصتها لـ"أهل مصر" قائلة: أنا البنت الوسطانية فى اخواتى البنات لأننا مش معانا اخوات صبيان، ووالدى راجل طيب ومرتاح ماديا، وعمره ما بخل علينا بشئ وكل اللى نفسنا فيه بيشتريه ويخاف علينا جدا، وعشان ميخليناش نحس بأى ظروف صعبة بعد الزواج كان بيجيب لكل واحدة فينا أنا وأخواتى لما تتجوز شقة عشان يخفف حمل الإيجار أو السكن على زوجها، وحصل كدا مع أختى الكبيرة وجوزها طلع راجل محترم وقدر الجميل اللى عمله والدى وكان بيحاول يدفع إيجار لوالدى لكن بابا رفض، واتكرر الأمر معايا لكن بالعكس مع زوج طماع عايز عيشة ببلاش ويعمل نفسه قدام الناس راجل البيت.
وتابعت حديثها قائلة: لما اتجوزنا وبابا جاب لنا الشقة، كان بيتعامل معاه عادى ولا حتى شكره ولا عرض عليه زى جوز أختى انه يدفع إيجار على الرغم ان والدى كان هيرفض، لكن الغريب انه من أول ما اتجوزنا مش بيجيب حاجة فى البيت وبنعيش بفلوسي اللى كانت معايا أو والدتى تجيب لى حاجات ولما أطلب منه يجيب حاجة فى البيت يقول لى اتصلي بأهلك يجيبوه ليكى مش فاضي ولا بيدفع مليم، لحد ما والدى حس انه إنسان استغلالى وميعرفش حاجة عن الرجولة عشان كدا رفعت دعوى الخلع و مازالت الدعوى منظورة أمام القضاء.
تابعوا آخر أهل مصر على Google News
