أسماء تطلب الخلع: جبان قدام أهله وفي الشغل وبيعمل عليا راجل بالضرب

'مش قادرة أستحمل ضعفه قدام الناس وأهله، مش بيقدر يقول رأيه، كل حاجة يقول عليها حاضر حتى لو فيها ضغط عليه، وكدا حتى فى شغله، لكن ييجى عندى ويطلع عقدة النقص ويعمل راجل ويتحكم فى تصرفاتى حتى خروجى عند أهلى، وأحيانا يتعدى عليا بالضرب لحد ما بقيت مش قادرة أكمل معاه'.

جاءت هذه الكلمات على لسان أسماء وهى داخل محكمة الأسرة لرفع دعوى خلع من زوجها مبررة استحالة العشرة معه .

رفع دعوى خلع

وقالت الزوجة فى مستهل حديثها مع 'أهل مصر': 'اتجوزت من سنة، ومن يوم الفرح وأنا عايشة مع مريض نفسي عنده عقدة نقص مش بيعرف يسيطر على اللى حواليه، وضعيف قدام كل الناس وفى الشغل ومع أهله لكن معايا فى البيت بيعوض شعوره بالنقص بفرض سيطرته عليا بشكل مش طبيعى وبتوصل للضرب أحيانا، وبيمنعنى من الخروج حتى لأهلى، دا أخوه الصغير بيكلمه وحش جدا وميقدرش يرد لكن معايا بيتحول لشخص تانى'.

محكمة الأسرة

وتابعت أسماء حديثها: كنت بحاول اتحمل عشان كلام الناس والمجتمع ومبقاش مطلقة من أول سنة جواز لكن مقدرتش، بقيت بكره اللحظة اللى بيقعد فيها فى البيت وطلبت منه الطلاق ولما سمع ضربنى وشتمنى بأبشع الألفاظ عشان كدا قررت أرفع دعوى خلع، ومازالت الدعوى منظورة أمام القضاء.