'عمري ما كنت أتخيل إن جبروته هو وأمه يوصلهم إنهم يخططوا زي الشيطان كدا، لما تستغل أمه زيارتي لأهلي أسبوعين في محافظة تانية وتنفذ تهديدها ليا إنها هتجوزه واحدة تانية قريبتها وأنا أكون الخدامة ليهم، وأرجع الاقي متجوز على فرشي وشقتي وحماتي تقولي سيبهم عرسان جداد تعالي اقعدي معايا في الشقة تحت، منهم لله كسروني وخربوا بيتي'.. جاءت هذه الكلمات على لسان أسماء وهي داخل محكمة الأسرة لرفع دعوى الخلع من زوجها مبررة استحالة العشرة معه بعد أن تزوج عليها في الخفاء ورفض أن يطلقها ويريد أن يتركها حتى تعود إليه وترضى بالأمر الواقع.وروت الزوجة قصتها لـ 'أهل مصر'، 'أنا من محافظة ثانية مش محافظته وهو كان يشتغل في نفس المحافظة بتاعتنا فترة مؤقتة وشافنا وكلمنا وبعدها طلب أنه يتقدم بس محتاج فترة يكلم أهله، وحسسني أنه هيتحدى كل العالم عشاني، وفعلا صدقته وبعد 4 شهور اتقدم ليا رسمي واشترط عليا أننا نسكن في بيت أهله في محافظته، لأنه خلص شغل هنا وكمان والدته محتاجة حد يساعدها، وعلى الرغم إني مكنتش مرتاحة لوالدته لكن وافقت واعتبرتها زي والدتي وست كبيرة ولازم أساعدها، وفعلا اتجوزنا وكانت الحياة في الشهور الأولى كويسة مع جوزي لكن حماتي كانت بتخلق المشاكل من تحت الأرض عشان تهيني وتغلط فيا وفي أهلي'.
وتابعت حديثها، 'كنت بتحمل معاملتها ليا على أمل أنها تتغير وربنا يهديها لكن بعد سنة ونص من الزواج وربنا مرزقنيش بأطفال بدأت تحرض جوزي عليا وكل يوم تقوم مشكلة لحد ما حسيت جوزي بدأ يتغير معايا ويبقى في صفها في كل حاجة، وطلبت منه أروح أزور أهلي أسبوعين وهو وافق وفعلا وصلني لحد بيت أهلي ومكنتش أعرف أنه مخطط لكل حاجة وأنه خاطب من كام شهر من ورايا، لحد ما رجعت من السفر بعد أسبوعين لقيت قريبته في شقتي وهو معاها وعرفت انه اتجوزها، وبيطلبوا مني أرضى بالأمر الواقع ورفضت وطلبت الطلاق لكن رفض، فرفعت عليه دعوى خلع ومنتظرة أولى الجلسات'.
تابعوا آخر أهل مصر على Google News
