مريم تطلب الخلع: بيكلم بنات على النت وكرهت عيشتي معاه

'حياتى معاه أصبحت متوترة بسبب علاقاته النسائية الكتير، وطول الوقت بيكلم بنات ومطلقات على مواقع التواصل الاجتماعى، والغريبة انه مش حاسس بالذنب، ولما واجته اعترف أنه بيكلم بنات من باب التسلية والمتعة فقط لا غير لكن عمره ما هيفكر أنه يتجوز عليا، وعايزنى اتقبل الوضع دا لكن أنا مش قادرة وكرهت العيشة والحياة كلها معاه وعايزة أعيش أربي بنتى بعيد عن ذنوبه اللى غارق فيها، لكن هو رافض'.. نطقت بهذه الكلمات 'مريم' وهى داخل محكمة الأسرة لرفع دعوى خلع من زوجها مبررة ذلك باستحالة العشرة معه.

كلام إباحي

وقالت الزوجة فى مستهل حديثها مع 'أهل مصر': اتجوزت من 3 سنين جواز صالونات ومكنتش أعرف عنه أى حاجة قبل كدا، وكان فى فترة الخطوبة إنسان كويس، لكن بعد الجواز بقي شخص تانى، كل يوم أكتشف أنه بيكلم بنات على النت، والكلام ممكن يكون إباحى فى أوقات كتيرة، واتخانقت معاه فى البداية، واعتذر وقال مش هيكررها لكن للأسف اتكررت رغم القسم اللى أقسمه.

من باب التسلية

وتابعت مريم حديثها بكلمات بسيطة: حاولت معاه كتير لكن مفيش فايدة لدرجة أنه بقى يعترف أنه بيكلم بنات من باب التسلية والمتعة وبيطلب منى أكبر دماغى لكن متحملتش، وطلبت الطلاق الذى واجهه بالرفض، فتقدمت إلى محكمة الأسرة لرفع دعوى خلع ومنتظرة أولى الجلسات.