"من أول ما اتجوزنا وهو عينه على فلوسي أنا بشتغل على ماكينة خياطة في البيت والحمدلله بكسب كويس وبساعد معاه في مصروف البيت من نفسي لكن اكتشفت أنه عايزني أصرف أنا على البيت من الألف للياء، وهو يشيل فلوسه باسمه حتى الشقة رفض يكتبها باسمي ولما رفضت حكى لوالدته اللي قلبته عليا أكتر وأنه مش عارف يحكم عليا لحد ما قام كسر على دماغي دستة كوبايات فتحت راسي منه لله".. جاءت هذه الكلمات على لسان "نهى"، وهي داخل محكمة الأسرة لرفع دعوى خلع من زوجها، بعد عام وشهر من الزواج مبررة استحالة العشرة معه بعد ما فعله معها.
وقالت الزوجة في مستهل حديثها مع "أهل مصر"، "أنا اتجوزت من سنة وشهر وكنت بشتغل قبل ما أتجوز ومعايا ماكينة خياطة، وقررت أني أخدها بعد الجواز معايا وأساعد معاه في البيت، وفعلًا حصل دا، وكنت بدفع أكتر من نص مصاريف البيت لحد ما اتفجأت أنه بيطلب مني أتحمل كل المصاريف حتى مصاريفه الشخصية، وأنه هو هيشيل مرتبه للزمن، طلبت منه يكتب الشقة باسمي تحسبًا للزمن رفض وأصر أن أي فلوس من شغلي هتتدفع في البيت وأنا أصريت على رفضي نهائيًا.
وتابعت نهى حديثها قائلة: "افتكرت أنه قفل على الموضوع لحد ما أمه أدخلت في الموضوع وهو حكى قدامها، وانحازت ليه وحرضته عليا لحد ما تعدى عليا بالضرب لدرجة أنه فتح دماغي لما كسر عليا دستة كوبايات كاملة، وروحت المستشفى وأخدت غرز، وقررت أني مش هرجع ليه تاني وطلبت الطلاق الذي واجهه بالرفض؛ فرفعت دعوى خلع ومازالت الدعوى منظورة أمام المحكمة".
تابعوا آخر أهل مصر على Google News
