أسماء فى دعوى خلع: "جاب عاهرة البيت وطلب مني أحضر لهم عشاء"

'آخر حاجة كنت أتوقعها أنه يجيب عاهرة البيت بلبسها المستفز والعريان دا، عشان يحرق دمى ودخل بيها أوضة النوم وطلب منى أحضر لهم العشاء عشان يقضوا وقت مع بعض، كرهته فى لحظة وسبتله البيت والدنيا كلها'.. نطقت بهذه الكلمات أسماء وهى داخل محكمة الأسرة لرفع دعوى خلع من زوجها بعد عامين ونصف من الزواج مبررة استحالة العشرة معه.

سنتين ونص جواز

قالت الزوجة: 'تزوجته بعد ما أهلى اقنعوني انه كويس ومحترم، وأنا صدقت كلامهم رغم أنى مكنتش حاسة بحاجة من ناحيته، لكن قلت مع الأيام هتعود وهيكون بينا حب، ولكن للأسف اتزوجنا واكتشفت أنه بيعشق الستات والشرب ومحدش يعرف عنه كدا، وكمان بيقضى أيام كتيرة فى أحضان الساقطات فى الشقق المفروشة ، ومقدرتش أتحمل ييجى كل ليلة وأنا عارفة أنه خانى أو ريحته كلها خمرة، بقيت بقرف من لمسته وريحته وقربه منى'.

رفع دعوى الخلع

وتابعت حديثها لـ'أهل مصر': 'بقت حياتنا كلها خناق، وحرمت نفسى عليه لحد ما يبطل خيانة وشرب، وكنت فاكره أنه هيعقل لكن عاندنى واتفاجئت به جايب بنت عاهرة وجاى بيها الشقة، وطلب منى أحضر لهم العشا، عشان هيقضى معاها الليلىة فى الشقة، كسرنى محستش بنفسى غير وأنا فى الشارع بدور على أى وسيلة أروح بيها بيت أهلى، وطلبت الطلاق ورفض، ففضلت أنى أروح محكمة الأسرة وارفع دعوى خلع ومنتظرة حكم القضاء بالخلع'.