تقدم بدعوى قضائية أمام محكمة الأسرة لرفع دعوى نشوز ضد زوجته بعد 3 سنوات من الزواج مبررا ذلك بقوله: 'عرفت تخدعنى صح 3 سنين عيشتني مغفل وهى ليها عشيق من قبل الزواج واستغلت وجود فلوس الشغل فى البيت واخدت 50 ألف جنيه وهربت مع عشيقها في نص الليل صحيت ملقيتهاش جنبي ولا لقيت الفلوس وأهلها ميعرفوش عنها حاجة، بس نسيت تليفونها ولقيت عليه كل رسايل خيانتها، منها لله شوهت سمعتي وشرفي قدام أهل المنطقة، مبقتش قادر ارفع عيني في حد، وكمان هان عليها وسابت ابنها اللى عنده سنتين'.
٣ سنين جواز
قال الزوج' اتجوزتها من ٣ سنين كان زواج تقليدي مكنتش اعرفها قبل كده حد رشحها ليا، ولقيتها طيبة وبتسمع الكلام وافقت عليها، كنت فى فترة الخطوبة بنتعامل عادى ما فيش مشاعر من ناحية حد فينا، لكن لما اتجوزنا بقيت احس انها حياتى وحبيتها، وللأسف ثقتى فيها عالية جدا وهى كمان كانت بتعاملنى كويس منكرش كدا، وكنت فاكر انها بتبادلنى نفس الشعور، انا فاتح محلات تجارة ورزقي واسع وعمرى ما حرمتها من حاجة ؛ وحياتى بقت افضل لما ربنا رزقنى بولد ملئ عليا الدنيا، بس كانت ديما مشكلتنا بسبب أنها مهملة فى ابنها وكنت بنصحها بدل ما تقعد النت ولا تتكلم في التليفون تركز مع ابنها، ومكنتش اتخيل انها بتخونى على التليفون مع عشيقها.
رفع دعوى نشوز
وتابع الزوج لـ'أهل مصر': 'في يوم كنت رايح ارد فلوس لتاجر ولقيته مش موجود وروحت البيت وخدت الفلوس معايا على أساس ان بيتي أمان ومراتي ست محترمة، لكن الصبح صحيت على عياط ابنى اللى عنده سنتين وملقتهاش جنبة دورت عليها مافيش ولقيت تليفونها نسيته ولما فتحته لقيت رسايل مع عشيقها واتفاقهم أنهم يهربوا، واخدت فلوس الشغل حتى ابنها الطفل الصغير سبته، فضحتنى وسط المنطقة وأهلها اتصدموا ومكنتش قادر ارفع عينى فى حد عشان كدا ذهبت إلى محكمة الأسرة لرفع دعوى نشوز وانتظر حكم المحكمة.
تابعوا آخر أهل مصر على Google News
