فجر فؤادة بغدودة، والد لاعب المصارعة أحمد فؤاد بغدودة الهارب، مفاجأة من العيار الثقيل رداً على تصريحات الاتحاد المصري للمصارعة.
وقال فؤاد بغدودة، خلال مداخلة هاتفية مع الإعلامية لميس الحديدي في برنامج 'كلمة أخيرة' المذاع عبر قناة 'أون': 'أنا راجل بسيط سواق توكتوك ومش بعرف أعبر بس عاوز أرد على التصريحات اللي في شاشات التليفزيون أن ابني هارب أنا راجل شقيان على ولادي وعندي غيره 2 أطفال وابني مش بياخد 7 آلاف جنيه'.
وأضاف والد لاعب المصارعة: 'ماعنديش مبرر للي حصل أنا داخل أرد على سكرتير عام الاتحاد العام للمصارعة بيقول أنه بياخد 7 آلاف جنيه والله ابني ما شاف أكتر من 2200 من المشروع القومي الأوليمبي ولسه بادئين يتصرفوا من شهرين فقط ولايحصل على أموال منذ سنوات طويلة من الاتحاد'.
والد أحمد بغدودة: أنا سواق توك توك وأنا اللي بصرف عليه مش الاتحاد
وتابع فؤاد بغدودة: 'أنا راجل على قدي وماعرفش أعبر عن اللي جوايا أنا زعلان ومكبوت على ابني ومش عارف أوصله، ابني معرفش عنه حاجة وماقليش... ابني طالع من مصر بطولة إفريقيا ده اللي اعرفه وكان بيحلم طول عمره وهو شخص أمين ومؤدب وحلمه الوحيد الميدالية الأوليمبية'.
واستطرد قائلاً: 'أنا مكنتش عاوز أرد على الانتقادات اللي وجهت لابني.. ابني مش بياخد راتب بقاله 12 سنة في الاتحاد مخدش جنيه من الاتحاد ومن المشروع القومي 2200 من البريد ومعايا إيصالات تثبت كلامي وبقاله سنة مخدش مليم من الاتحاد وكان مصروف له 16 ألف جنيه خصموا منه 14800 بحجة الضرائب وإدوله 1200 جنيه'.
ووجه والد لاعب المصارعة رسالة للاتحاد قائلاً: 'عاوز تعمل بطل ومش بتديله فلوس يعني طول الوقت قاعدين تقولوا الولد هرب، لو كان عاوز يهرب من زمان كان هرب من وقت كرواتيا ومعاه التأشيرة' الشينجل 'من مارس الماضي لكن الحقيقة ابني تعرض لمعاملة سيئة وضغوط كبيرة وكفاية معاملة المدرب ليه وبيخلوه يلعب بالعافية وهو مصاب.
ورداً على الحديدي بيصرف منين قال: 'أنا اللي بصرف عليه والله جزمة اللعب بيستلفها أنا بوجهله رسالة إرجع مصر هي أولى بيك وإحنا أتولدنا فيها وهنعيش ونموت فيها'.
تابعوا آخر أهل مصر على Google News
