صورة.. فتاة تطلب من حماقى الشهادة على عقد قرانها

ناشدت إحدى الفتيات، الفنان محمد حماقي، لحضور عقد قرانها، والشهادة عليه، دون أن يغني إذا أراد.

وقالت الفتاة في رسالة تداولها العديد من النشطاء عبر موقع التواصل الاجتماعى، فيسبوك: "بصوا أنا مش عارفة أقولهالكوا إزاي، ولو ده جنان ف أنا هاتجنن ولو لمرة واحدة ف عمري، ومفيش حاجة مستحيلة، أنا أمنية جوايا من 11 سنة، وجه وقت محاولة تحقيقها، حماقي‬ يحضر فرحي".

وأضافت: "وبما إني مش هعمل فرح، فأنا عاوزاه بس يحضر ويشهد على عقد جوازي، مش عاوزاه يغني بس يحضر"، متابعة: "اللي فيكوا عارفني من زمان، هيبقي عارف كويس أوي الأمنية دي بالنسبالي إيه، شبيه أحمد حلمي اتمني عمره كله أحمد حلمي يحضر فرحه، ووجه دعوة رسمية لحلمي، وحلمي فاجئه وجاله فرحه".

كما أكدت: "مفيش مستحيل، بس اللي فيكوا يعرف أوجه دعوة رسمية لحماقي إزاي يقولي، وانتوا اللي طالباه منكوا البوست ده يلف الفيسبوك لحد ما يوصل لحماقي نفسه أو على الأقل حد يوصله لحماقي، جنان ؟ أوكي أنا مجنونة بس مش هفضل ساكتة، تافهة؟ أوكي بردو أنا راضية أبقي تافهة لو هحقق أمنية بتمناها، خليك إنت يا صاحب الشأن العظيم قاعد علي الكنبة".