قال الدكتور محمد علام، نائب مدير مستشفى النجيلة بمطروح، عن وفاة ناجي الجراري مدير المخازن بالمستشفى، "أحنا بشر واتحملنا فوق طاقة أي بشر، الناس كانت مفكرة أنه شو إعلامي، وأن مفيش حاجة ودايمًا مشككين في كل حاجة.. وقع مننا ناس وأحنا شغالين وكملنا فبلاش استغلال لمحنتنا ادعولنا".
منشور عن وفاة مدير مخازن مستشفى النجيلة
وأضاف الدكتور محمد علام في منشور له على صفحته عبر موقع التواصل الاجتماعي "فيسبوك"، "تخيل لما ممرض أو طبيب أو عامل أو فني يدخل على زميله يديله العلاج والحقن والجلسات، تخيل إحساسه لما يشوف حالتنا بتسوء ومطلوب منه يقف على رجله ومش قادر يعمله حاجه
كان من أسبوع أو اتنين بنضحك ونهزر سوا، وفجأه بقينا مرضى لمرض محدش فاهم بيعمل في جسم الإنسان إيه".
واستطرد قائلا "تخيل أنت كطبيب تشوف واحد زي والدك ومعتبره والدك حالته بتتدهور، ووصل لمرحلة اللا رجعة، وكلها ساعات ويموت وتقف عاجز، تخيل إنك تشوف زميلك بيموت قدامك ومطلوب منك متدمعش ولا تنهار علشان باقى المرضى من فريقك ميقعوش منك، تخيل شكل الدكاترة زمايلي وهما داخلين عليا النهاردة يطمنوا على حالتي، ولسه إمبارح كانوا مع واحد ميت، فوق طاقة البشر والله ولسه مستحملين ومكملين والناس مش سايبانا في حالنا".
وتابع نائب مدير مستشفى النجيلة بمطروح: "مفيش خطر عليك وأنت قاعد في بيتك أو وأنت واخد بالك وأنت نازل، الخطر علينا واستقبلناه بقلوب راضية وبعزيمة قوية لشهور، ولما أصاب مننا ناس متهزناش أول مقدرت أقف على رجلي كنت بمر عليهم وأقويهم لكن في الحقيقة، كنت بتقوى بيهم لحد أخر لحظة ولسه هنكمل علشان نخف ونرجع نكمل شغلنا، ادعوا لكل الفريق بالنجيلة أحنا راضيين بقضاء الله وعمي ناجي ربنا إداله شرف الشهادة، أحنا للأسف معرفناش ننوله وبنخف".
وكان مدير المخازن ناجي الجراري توفى في الساعات الأولى من اليوم السبت، وتم تغسيله وتكفينه والصلاه عليه في مستشفى النجيلة ليتم دفنه في مرسى مطروح.
تابعوا آخر أهل مصر على Google News
