علّق الفنان نبيل الحلفاوي على الأزمة التي تعرض لها البطل الأوليمبي أحمد الجندي، بعدما شكا عبر صفحته بموقع فيسبوك، من تعنت مسؤول في استاد القاهرة، أثناء الذهاب للتدريب.
وقال الحلفاوي عبر حسابه الشخصي على 'تويتر': 'المسؤول دا لازم يتجاب، وعلى الأقل يتكدر من الأكبر منه.. ويفهموه حدوده'.
وكان البطل الأولمبي أحمد الجندي، لاعب منتخب مصر للخماسي الحديث، والمتوج بالميدالية الفضية لأولمبياد طوكيو 2020، أبدى غضبه من قرارات أحد مسؤولي مجمع حمامات السباحة، باستاد القاهرة الدولي، الذي عرضه لموقف محرج اليوم الأربعاء، أثناء ذهابه للتدريبات.
وحكى أحمد الجندي الموقف الذي تعرض له عبر حسابه الرسمي بموقع التواصل الاجتماعي فيسبوك، قائلا: 'حصل موقف النهاردة عند مجمع حمامات السباحة بستاد القاهرة الساعة 6 الصبح وانا داخل التمرين الأمن قال لي إن في تعليمات بعدم دخول العربيات لـparking المخصص لحمام السباحة ولا حتى الركنة في محيط الباب الخارجي للجراچ يعني لو عايز تركن يبقى تروح تركن بعيد عن الباب بحوالي 100 متر'.
وأضاف: 'يعني انت محتاجلك حوالي من 10 لـ 15 دقيقة عشان توصل لحمام السباحة نفسه بسبب مسافة الـparking الكبيرة أساسًا..المهم بسأل الأمن ليه التعليمات ده قال لي أصل في (مسؤول) كان داخل حمام السباحة امبارح الثلاثاء (اتعطل ١٢ دقيقة)!!! فالدنيا اتقلبت و(المسؤول) قرر أنه يعاقب الكل أن مفيش عربيات تدخل الـparking اللي بياخد حوالي 200 عربية بدون عمل أي اعتبار إن ده لاعب منتخب ولا أي حاجة ومش بس كدة لا، ده كمان محدش يركن في محيط الباب الخارجي أصلًا اللي هو انا بعاقبك انك هتدخل بشنط التمرين 15 دقيقة مشي الساعة 6 الصبح وتتأخر على تمرينك عشان (انا المسؤول) اركن مكان الـ200 عربية'.
وأكمل الجندي: 'يعني انا ابقى صاحي 5 الصبح وورايا يوم طويل عشان اروح مكان التمرين اللي هو أصلا المفروض تبقى كل حاجة متسهلة فيه مش بنقول بقى ده موقف في الشارع فطبيعي انه يحصل، ومع كامل احترامي الفكرة إن (المسؤول) ده المفروض انه عارف قد ايه أن اللاعب بيبقى الصبح صاحي مش شايف قدامه من قلة النوم أو المجهود فبدل متيسرله تمرينه لا احنا نعطله أكتر'.
وتابع: 'أنا مش هربط الموضوع ده بموضوع (محمد الشوربجي) لاعب الاسكواش لإن المشكلة دي تعتبر نقطة في بحر وممكن أي حد تاني يشوفها مش مستاهلة ولا أي حاجة لكن لا أي حد بيلعب رياضة بشكل محترف هيفهم النقطة في أن كل واحد فينا مبيصدق يلاقي حاجة تريحه يعني انا لو عليا كنت ركنت عربيتي مكان الـstart بتاع حمام السباحة..السؤال اللي كنت عايز اسأله هنا.. حضرتك ناوي تفضل معاقبنا لحد امتى؟!'.
وعلق الدكتور أشرف صبحي، وزير الشباب والرياضة، على الموقف الذي تعرض له الجندي قائلا، إن حالة الفوضى التي تشهدها بعض قطاعات الرياضة لا يجب تعميمها على الوسط الرياضي بأكمله.
وأضاف أشرف صبحي اثناء لقائه مع الإعلامي أحمد موسى، ببرنامج 'على مسئوليتي' على قناة صدى البلد: 'الرياضة المصرية بخير، ويتم التخطيط لها بشكل كبير، وتوجد قوانين لمن يخرج عن الأطر الفردية»، مضيفا: «الوزارة تحترم المواثيق الدولية، في كافة الشؤون الرياضية'
وعن الموقف والأزمة التي تعرض لها البطل الاولمبي أحمد الجندي، أوضح أشرف صبحي قائلا:'أحمد الجندي ابني، يدرس في الأكاديمية العربية ويتسم بالأدب والاحترام ونوفر له جميع أنواع الرعاية، نحن معه، ولدينا اتفاق مع الأكاديمية بإتاحة منح لأبطالنا وبينهم أحمد الجندي للتعليم مجانا'
وتابع حديثه: 'الدولة المصرية تبذل هذه الجهود دون مبالغة لأبنائنا، تلقيت الأزمة وأنا في مجلس الوزراء، واستأذنت وتواصلت مع المسئول في استاد القاهرة فأخبرني أن الموضوع متعلق بأمر تنظيمي في الاستاد وليس بالنسق الذي تم تداوله ، وأحمد حساس فبعد إخباره من قبل الأمن كتب الأزمة، وتدخلت بنفسي في الأمر لحل الأزمة..نقدم تسهيلات رياضية للأبطال في جميع الألعاب، موضوع أحمد الجندي أمر إداري ولا يرتقي إلى الأزمة'.
تابعوا آخر أهل مصر على Google News
