تحل اليوم، ذكرى ميلاد الفنان حسن مصطفى، حيث إنه ولد في 26 يونيو عام 1933 بحي الظاهر، وتخرج في المعهد العالي للفنون المسرحية عام 1957، وظهر حبه بالمسرح أثناء مرحلة شبابه، فالتحق بفرقة إسماعيل ياسين.
ميمي جمال وبداية تعارفها بحسن مصطفى
وقالت ميمى جمال من قبل عن زوجها: 'أنا بعد ما حسن توفى، قعدت 6 سنين في البيت وبطلت كل حاجة، ولما رجعت للتمثيل تاني، وحسيت كأني لسه وجه جديد، وحسيت أن الوسط الفني اتغير وكان شديد الطيبة ومحبًا لأبنائه، وكان يعطي النصيحة مجردة، ودائم التعبد والصلاة، أنا بعد وفاته حسيت أن ظهري اتقسم'.
قالت الفنانة ميمي جمال: 'زوجي الفنان الراحل حسن مصطفى كان زميلي في فرق التليفزيون اللي عملها سيد بدير واحنا كنا في المسرح الكوميدي، وأنا كنت في الفترة دي مخطوبة لضابط وعندي 17 سنة، وكان شاب قمر وعرفنا بعض سنة ونصف وبعد كده قلت له يلا بقى عايزين نتجوز فقال لي أنا مستنيكي تبطلي تمثلي علشان اتجوزك فقلت له أبطل تمثيل ليه ما انت بتاخدني توصلني لما بروح المسرح فرفض، وقال لي مينفعش أبقى ظابط ويتقال لي أنا شوفت المدام في الفيلم امبارح'.
قصة حب ميمي جمال الأولى
وتابعت خلال لقائها ببرنامج 'واحد من الناس' الذي يقدمه الإعلامي عمرو الليثي بقناة 'الحياة': 'حصلت ما بيني وبين خطيبي الظابط مشاكل وحصلت جوايا كسرة جامدة وقلت له كنت عرفتني من زمان مش تسيبني الفترة دي كلها وبعدين جاي تقولي مش هاتجوزك الا لما تبطلي تمثيل، وكنت وقتها بدأت اشتغل مسرحية مطرب العواطف وكان حسن مصطفى من النوع اللى يحسسك إنه أبوك وأخوك وعمك وخالك، ودنه بتسمع فابتدي يتكلم معايا واخدنا على بعض وارتبطنا ببعض وقلت ابويا توفى وانا محتاجة لحد واخلف'.
وأكملت باكية: 'حكيت لـ حسن مصطفى حكايتي وابتدينا ناخد علي بعض واتعودنا على بعض وهو يحكيلي وانا احكيله، هو كان متجوز قبلي وكان عنده بنت سمية حبيبتي، فحصل حاجة بينه وبين مراته، وجاء سيد بدير وقال والله لو بتحبوا بعض ليه ماتتجوزوش فقلت له هو متجوز لما أموره تستقر ويشوف هو عايز ايه نبقى نتكلم، لكن أنا دلوقتي مقدرش أتجوز إنسان معرفش ظروفه إيه وظروف مراته إيه لإني مسمعتهاش، وقتها طلق مراته لإنه كان نفسيته تعبانة جدا معاها وبعديين اتجوزنا بقى وعشنا مع بعض 45 سنة وهي الجوازة الوحيدة اللي في حياتي'.
رفض والدة ميمي جمال لحسن مصطفى
ولفتت: 'ماما مكنتش موافقة إني أتجوز حسن مصطفى، وقالت لي لا هو صغير ولا حليوة ولا انتي أول بخته وأكبر منك بـ14 سنة وموظف معاكي في نفس المكان وبياخد نفس مرتبك وهو أصلا كان بيشتغل في التربية والتعليم كان وكيل وزارة'.
حسن مصطفى
قدم الفنان حسن مصطفى خلال مشواره ما يقرب من 400 عملاً فنيًا، إلا أن المسرح كان له نصيب الأسد من مسيرته الفنية، اذ استطاع أن يكون واحدًا من نجوم المسرح وشارك في أهم المسرحيات في تاريخ المسرح المصري، منها 'مدرسة المشاغبين، العيال كبرت، حواء الساعة 12، سيدتي الجميلة، الكدابين قوي، دو ري مي فاصوليا، الدبابير، الكدابين اوى،' وغيرها.
رحيل الفنان حسن مصطفى
رحل الفنان حسن مصطفى يوم 19 مايو عام 2015 عن عمر ناهز ال 81 عاما بعدما تعرض لأزمة قلبية نقل على إثرها للمستشفى، وهناك لفظ أنفاسه الأخيرة بعدما أثرى السينما المصرية والعربية بالعديد من الأعمال التي تظل خالدة.
تابعوا آخر أهل مصر على Google News
