علق أشرف أبو اليسر، الطيار المفصول بسبب أزمة محمد رمضان، على التصريحات التي قالها رمضان اليوم على أن الطيار طلب منه 9 ونصف مليون جنيه، مشيرا إلى أن هذا الكلام غير صحيح ولم يطلب أي أموال مطلقا.
وأوضح الطيار المفصول في مداخلة هاتفية ببرنامج '90 دقيقة' المذاع عبر قناة 'المحور'، ويقدمه الإعلامي محمد الباز، قائلا: 'لو فيه أي حد من الإخوة اللى كانوا معايا وساندونى، قال إنى طلبت مليم من حد يبقالى الكلام، أنا مطلبتش مليم من حد، لأن تاريخى ووضعى اللى كان هينتهى بعد 3 سنوات ونص بتكريمي، النهاردة انتهى بفصلى عن الشغل وإيقافي عن الطيران'.
وتابع الطيار حديثه قائلا:: 'بصفتى راجل كنت في القوات الجوية قبل كده، ولي وضعى وتاريخى مقدرش أطلب رقم من أي حد وأقوله ادينى لو سمحت عشان أنا اتظلمت'، موضحا أنه فى الطائرة لا يوجد حاجز بين الراكب والطيارين، وأى أحد يجلس يمكن بخطوتين يكون في 'الكابينة'.
واكمل قائلا: 'الفنان محمد رمضان لما دخل الكابينة مفيش حد هيقوله متدخلش، لما دخل كان الكرسى اللى جنبى فاضى لوجود الطيار المساعد في الحمام، وقعد على الكرسى وطلب ياخد صورة تذكارية، وكثيرا من القامات الكبيرة طلبت تاخد صورة تذكارية وهى صورة شخصية وليست للنشر، وأنا قلت لمحمد رمضان الصورة دى لو اتنشرت هتقفل بيوت، هو قعد بس مش معناه إنه هو اللى بيسوق الطيارة'، مؤكداً: 'اللقطة طلعت إني دخلته وسمحتله يتصور وإني طلبت منه فلوس والله ما حصل'.
وكان الفنان محمد رمضان نشر فيديو منذ قليل على حسابه الرسمي على موقع 'فيس بوك' قال فيه، إنه تواصل مع صديق له، وهو مدير شركة 'هوليداي للطيران الخاص'، وبعت له السيرة الذاتية الخاصة بالطيار أشرف أبو اليسر، ووعده أنه خلال أسبوع سيكون من الطيارين العاملين في الشركة ويعود إلى مهنته.
وواصل رمضان كلامه قائلا، أنه تواصل أيضًا مع سعيد إمام، مدير شركة روتانا، ليتواصل مع مع الكابتن أبو اليسر، لكي يبلغه أنه منتظر السيرة الذاتية، فكان رده بالرفض بسبب أن رخصته مسحوبة، ولا يستطيع أن يعمل في مكان آخر، وتابع قائلا: 'ده اللي كنت أقدر أعمله ولكن كابتن أشرف بعت المحامي الخاص به لمدير الحسابات بتاعي ليعوضه ماليًا بتعويض يبلغ 9 ونصف مليون جنيه، فأنا سايب الحكم للي بيعلقوا ولو أنتوا شايفين أن ده يرضي ربنا أنا هعمل ده'.
تابعوا آخر أهل مصر على Google News
