شقيقة طالبة المعادي: صاحبتها لمّت عصابة وأختي اتصابت فى القرنية

حصلت 'أهل مصر' على التقارير الخاصة بحالة الطالبة المعتدى عليها فى مدرسة ثانوية بالمعادى، حيث شهدت المدرسة الأسبوع الماضى مشاجرة بين طالبتين وتدخل مدرب جيم للتعدى على طالبة وإحداث إصابات لها.

تقرير طبي للطالبة المعتدى عليها

وقالت شقيقة الطالبة المعتدى عليها 'نورهان نبيل' فى تصريحات خاصة لـ'أهل مصر': يوم الخميس 11/3 حصلت الخناقة في مدرسة الشهيد على أحمد شوقي 'المعادي الثانوية بنات سابقا' بعد الامتحان، وتعدى شاب عنده 26 سنة مدرب بوكس في چيم عليا وعلى أختى وعلى المعلمين بالمدرسة بسبب مشكلة بينها وبين زميلتها فى المدرسة.

طالبة مدرسة المعادى

وأضافت: 'كان في مشكلة قديمة بين اختي خناقة بنات عادية وكانت بسنت هي وأصحابها عاملين عصابة عليها، وفي نص اليوم، يوم الخميس جت البنت هددتها قبل ما تخلص الامتحان وقالت لها إستني مني مفاجأة تحت المدرسة، راحت كلمتنى وقالت لى تعالى خدينى عشان خايفة يحصل حاجة تاني وأنا لوحدى وده لأن من شهر أم البنت دي جت قصاد المدرسة وهى مروحة نزلت من عربية شدتها من شعرها وجريت بيها والعربية ماشية وكانت هتموت.

اشعة طالبة معتدى عليها

تفاصيل مشاجرة مدرسة المعادى

وتابعت نورهان: أنا كنت رايحة شغلى فقلت لها ما تخافيش مفيش حاجة هاجي أروحك وأرجع شغلى على طول، وصلت برة المدرسة واتصدمت لما لقيت بسنت، جايبة شحط كبير مدرب بوكس اسمه علي محمد عيطه سيد، وجايبة مامتها تاني وبنات تانية كتير جدا، وهى برة لوحدها وأنا جوة اتصلت ببابا وماما يجولنا المدرسة عشان مكناش عارفين هنمشي ازاى.

طالبة مدرسة المعادى

وأكملت: واحنا خارجين من المدرسة البنت استفزتنى وكانت هتمد إيدها علينا، ولسه هندافع عن نفسنا، جه البلطجي اللى معاها ضربنى بالبوكسات ووقعنى في الأرض وفي اللحظة دي ماما وصلت هى وأختى التانية اللي كانت راجعة من الامتحان زيي ولحقوا أختى منه، فى نفس اللحظة أم البنت اتلمت علي أختى نهى هي وشوية البلطجية اللي معاها وفضل يجرجروها في الأرض عشان يدخلوها المدرسة بالعافية ويضربوها جوة، أختي الوسطانية فضلت تدافع وتحوش عنها مسكوها وحبسوها جوه المدرسة وفضلوا حبسينها ويضربوا فيها جوه، والبلطجي دة بعد ما سابنى وماما برة نط من فوق سور المدرسة هو وصحابه، ضربوا كذا بنت جوه المدرسة، وكان معاه شومة ضرب أختي اللي حابسينها جوه في عنيها وجنبها وضهرها بالشومة ونزل عليها بالبوكسات مرحمهاش لدرجة ان في مدرس كان واقف حاول يحميها وخد كل الضرب مكانها لما شافها كانت خلاص بتموت من الضرب.

التعدى على طالبة بالمعادى

وأضافت: وصلت الشرطة بعد نص ساعة من الاتصال وبعد ما كل حاجة كانت خلصت والبلطجي جرى وهرب بس جريوا وراه وجابوه، وقتها بابا كان لسه واصل وكان فى حالة ذهول من منظر أختى ودخل معانا القسم ، حاولنا نخليهم يدونا تصريح نودي نهى أختنا اللى اتصابت المستشفى عشان نلحق عينها لكن بدون جدوى، وفضلنا محجوزين ٧ ساعات و مش فاهمين اللي بيحصل ولا عارفين نكلم حد، نتيجة وأختى دلوقتي عندها مشكلة في القرنية وهي أصلا كانت عاملة عملية في عينها من شهرين، وكسر تحت العين وأسفل الحاجب وحصلها شرخ في الحوض مكان الضرب بالشومة.

وشهد محيط مدرسة الشهيد نقيب شرطة على أحمد شوقي علي عبد الخالق الثانوية العامة بنات بالمعادي، مشاجرة بين بعض الطالبات وشاب من خارج المدرسة، عقب امتحانات الصف الثاني الثانوي، أدت إلى إصابة إحدى الطالبات.

خناقة مدرسة المعادى

وقالت إحدى شهود العيان من أمام المدرسة لـ 'أهل مصر': 'في ولد ومعاه بلطجية اتهجموا على المدرسة عشان بنت، والواد مسك البنت ضربها وشدها من شعرها، وفضل يضربها في وشها، لحد ما أمن المدرسة بلغ الشرطة'.

وقالت ولي أمر طالبة بالمدرسة: 'أنا كنت هناك عند المدرسة وشوفت الولد نط من على البوابة ودخل جوة المدرسة، وبعدين الخناقة بدأت ومسك في بنت ضربها'.

مشاجرة مدرسة المعادى

وكان رواد مواقع التواصل الاجتماعي، تداولوا فيديو لمشاجرة بين الطلاب من أمام مدرسة الشهيد نقيب شرطة على أحمد شوقي علي عبد الخالق الثانوية العامة بنات بالمعادي.