سادت حالة من الغضب على موقع التواصل الاجتماعي فيسبوك، بسبب صور لمجموعة من البنات، داخل دار زمزم للأيتام، بمنطقة مصر الجديدة، بمحافظة القاهرة، أثناء حفل إفطار للموظفين والعاملين، حيث لم يقدم للأيتام إلا «رغيف حواوشي بايت».
ونشر المهندس رامي الجبالي على صفحته الرسمية عبر فيسبوك: «دي صورة صورها مجموعة بنات زي الورد، من دار زمزم في مصر الجديدة، وقت الإفطار رمضان النهاردة، الصورة دي فيها كمية قهر غير طبيعي، ليه بقي؟ عشان البنات دي اشتكت لوزارة التضامن الاجتماعي من سوء المعاملة من فتره، وبناء عليه حاليا بيتم التنكيل بالبنات دي، عشان قرروا يقولوا إن المعاملة وحشة وإننا كبرنا على المعاملة دي، وميصحش نتعامل زي العبيد».
وأضاف: «دي صورة وليمة معمولة لموظفين الجمعية على الإفطار، عصير وفراخ ولحمة ورز وخلافه، وفي المقابل كيس فيه كام رغيف حواوشي بايت، رموه للبنات تأكله علي الفطار».
وتابع: «البنات كلمتني تعيط وتقول إن موظفين وزارة التضامن خلاص بطلوا يردوا على تليفوناتهم، والبنات مبقتش عارفة تعمل إيه، ولّا تروح لمين، عاوزين حد يسمعهم بس».
وناشد نيفين القباج وزيرة التضامن الاجتماعي قائلا: «يرضيكي دا يكون فطار الأيتام في رمضان؟ يرضيكي البنات تكلمني تعيط وتقولي مش عارفين نكلم مين ولّا نروح فين؟ يرضيكي عرايس بدون لبس؟ واللي بتشتغل عاوزينها تبطل شغل لمجرد أنها اشتكت؟ واللي بيسحبوا تليفونها بيرجعوه محروق ومليان ميه عشان خايفين يكونوا مسجلين أو مصورين حاجة بيه؟!».
وأتم الجبالي: «البنات بتقولي المصروف بتاعنا بيتخصم منه بالـ50، والـ100 جنيه، عشان تأخير 5 دقائق، و10 دقايق بعد الساعة 9 مساء، في ظل الظروف اللي عايشين فيها دي كلها».
تابعوا آخر أهل مصر على Google News
