يواصل موقع 'أهل مصر' انفراده بنشر نص اعترافات النجار المتهم
بإنهاء حياة زوجته خنقًا داخل منزل الزوجية بقرية الجزيرة الخضراء التابعة لمركز مطوبس بمحافظة كفر الشيخ شهر يناير الماضي.
صورة تعبيرية
اعترافات المتهم بإنهاء حياة زوجته خنقًا
وأدلى 'أحمد. م. م. ا'، 28 عامًا، والمتهم بإنهاء حياة زوجته باعترافات تفصيلية أمام جهات التحقيق بمحافظة كفر الشيخ حول ارتكابه الواقعة، وذلك في القضية رقم 7271 لسنة 2024 جنايات مركز مطوبس والمقيدة برقم 799 لسنة 2024 كلي كفر الشيخ، وإلى نص الاعترافات.
س: ما علاقتك بالمجني عليها؟
-هي تبقى مراتي.
س: منذ متى وعلاقة الزوجية قائمة؟
-احنا متزوجين من حوالي 4 سنين.
س: وهل من ثمة خلافات زوجية فيما بينك وبين المتوفية إلى رحمة مولاها؟
-أيوه.
س: منذ متى وتلك الخلافات قائمة تحديدًا؟
-احنا بقالنا حوالي ٣ سنين في الخلافات دي.
س: وما هي طبيعة تلك الخلافات تحديدًا؟
-الخلافات دي كانت أني اكتشفت أن مراتي بتطلع أسرار بيتي بره والناس كلها بقيت عارفة إيه اللي بيحصل جوه بيتي.
س: وإلى أي مدى تطورت تلك الخلافات؟
- كانت بتحصل في الغالب ما بينا كل ما أتكلم معاها في الموضوع ده وكانت بتغضب وتروح بيت أهلها.
س: وما هو التصرف الذي بدر منك حال قيام زوجتك بترك المنزل والذهاب لمنزل والدها؟
- أنا مكنتش بعمل حاجة بس والدتي هي اللي كانت بتروح لها وتتكلم مع أهلها وترجعها البيت.
س: وهل استمرت تلك الخلافات؟
- أيوه احنا فضلنا في الموضوع ده كتير.
س: وهل قمت بإخبار أهليتها عن أفعالها وطبيعة تلك الخلافات؟
- أيوه أنا اشتكيت لأبوها أكتر من مرة بس هو مكنش بيصدقني وكان بيصدق بنته.
س: وما هو تاريخ بداية تفكيرك في قتل زوجتك؟
-الفكرة جات في دماغي من حوالي أسبوع تقريبًا بس أنا مكونتش ناوي أعمل حاجة لسه وكنت مستني ربنا يخرجني من الموضوع ده لحد اللي حصل بينا النهاردة الصبح قبل الفجر.
س: وما هي تفصيلات ما حدث بينك وبين زوجتك المتوفية إلى رحمة مولاها؟
-صحيت مراتي من النوم وطلبت معاشرتها فرفضت وقاومت، وخربشتني في وشي، وأنا روحت ماسك في رقبتها وفضلت أخنق فيها لحد ما ماتت تحت إيدي وأنا سيبتها زي ما هي على السرير، وروحت مغطيها بالفرشة، وكان ساعتها بنتي الصغيرة كانت بتعيط روحت شايلها ونيمتها وفضلت قاعد لحد الصبح لحد ما أمي صحيت من النوم ولما شافت مراتي راحت منهارة وصوتت وأخويا ومراته طلعوا والناس اتلمت، وبعد كده أهل مراتي وصلوا البيت عندي شالوها وطلعوا بها عالمستشفى و بعد كده المركز جالي البيت وأنا نزلت معاهم.
س: وهل كان أحد على علم مسبق بقيامك بقتل المجني عليها؟
- أيام المشاكل في الأول كنت بهدد بكده قدام أهلي وأهلها بس ده كان كلام بس لما أنا فكرت في الموضوع وجات الفكرة في دماغي مقولتش لحد.
س: وهل كان قيامك بارتكابك تلك الواقعة وقتل المجني عليها بناء على نية مسبقة وعزمك على قتلها؟
- هو أنا كنت بفكر بس مكونتش ناوي أعمل حاجة خالص دلوقتي ولما عملت معاها كده وموتها بسبب الانفعال والغضب مني لما طلبت معاشرتها وهي رفضت.
س: وما هو مقصدك حال قيامك بارتكاب تلك الواقعة؟
- أنا كان قصدي أقتلها وأخلص منها علشان أخد حقي منها.
س: أنت متهم بقتل المجني عليها زوجتك مع سبق الإصرار بأن بيت النية وعقدت العزم على قتلها بأن قمت بالإمساك بها من عنقها وخنقها محدثًا ما بها من إصابات والموصوفة بالتقرير الطبي المرفق قاصدًا إزهاق روحها وبلغت بذلك مقصدك على النحو المبين بالتحقيقات؟
- أيوه أنا قتلتها وأخدت حقي منها.
تابعوا آخر أهل مصر على Google News
