شهدت محاكم الأسرة العديد من قضايا الخلع والطلاق بأختلاف الأسباب والدوافع منها المعلن والكثير منها الخفي، أبطال هذه القصص أشخاصون عاديون مثلنا ولكن كتب لهم القدر أن تكتب اسماءهم فى سجلات القضاء، ورصدت ' أهل مصر' بعض قضايا محاكم الأسرة خلال هذا الأسبوع .
شيرين: "طردني بمقيص النوم في الشارع عشان طلبت منه يشتغل"
'كانت غلطتى من البداية لما وافقت إنى أتجوزه، ويكون ليا سند أنا ووالدتي بعد وفاة والدي، أمي كانت بتعتبره ابنها ورفضت إننا ناخد شقة إيجار وطلبت منه يعيش فى شقتنا، حتى الأكل كانت بتحط معاش والدى كله عشان تساعد في الأكل والشرب، وفعلا إتجوزنا وعشنا معاها وبدل ما يحاول يرد الجميل ويبقي راجل بجد استقوى علينا وبقي قاعد في البيت وعايزنا إحنا نصرف عليه حتى السجائر نشتريها ليه، ولما طلبت منه يشتغل عشان أحس إنه راجل تعدى علينا بالضرب'.. جاءت هذه الكلمات على لسان 'شيرين' وهى داخل محكمة الأسرة لرفع دعوى خلع من زوجها بعد 9 شهور فقط من الزواج مبررة استحالة العشرة معه.
محمد: "مراتى بتخوني مع شباب من على الإنترنت وبتصرف فلوسي عليهم"
لم يتوقع 'محمد' أن حياته الزوجية ستنقلب رأسا على عقب بعد الزواج بعام وشهرين فقط عندما يكتشف خيانة زوجته والتى تزوجها وفضلها على كل الفتيات وتحدى أهله من الزواج منها لتقوم بخيانته من شباب تتعرف عليهم على الانترنت والمواقع الإباحية وليس هذا فحسب بل كونت معهم علاقات لدرجة أنها كانت ترسل لهم أموال وكروت شحن من أموال زوجها حتى كشف الله سترها ورأى زوجها سوء أخلاقها ووقف داخل محكمة الأسرة لرفع دعوى تطليق واتهمها بالزنا بعد أن هددته بقائمة المنقولات عندما اكتشف حقيقتها.
هدى: "ببيسجلي وبيغير مني"
«عمري ما كنت أتوقع جوزي يبقى بالأسلوب ده، ويفكر بطريقة الشياطين، من أول ما اتجوزنا وهو عايز كل الناس تشوفني وحشة وأنه كتير عليّ، وبيستفزني عشان يطلع أسوأ ما فيا، وبيسجل ليّ من غير ما أعرف ويقص كلامي عشان اللي يعرفونا ياخدوا عني فكرة سيئة، وده اللي حصل فعلا وكل الناس بقت تبعد عني لحد ما شخص نور بصيرتي وقالي لي إنه بيسمعهم تسجيلات ليا وأنا بغلط فيه وفي أهله»، جاءت هذه الكلمات على لسان «هدى»، داخل محكمة الأسرة لرفع دعوى خلع من زوجها مبررة ذلك باستحالة العشرة.
أمل: جوزي عديم الشخصية وحمايا كل شوية يطردنى من البيت
تقدمت أمل بدعوى قضائية أمام محكمة الأسرة بزنانيري بعد عام وشهر من الزواج لرفع دعوى خلع من زوجها مبررة ذلك بقولها: 'عديم الشخصية وعمره ما يقدر يواجه أهله أو يعترض، هو يشتغل ووالده ياخد منه الفلوس وهو اللى يصرف على حسب ما هو شايف، حتى لو رايحة للدكتور مهما أكون تعبانة لازم والده يوافق، وأهلى ييجو شقتى بحساب، ولما قررت أرفض حياة الذل دى، وحمايا عرف طردنى وجوزى ولا فكر يقف قدامه'.
رحمة: أمه بتدخل علينا أوضة النوم وهو رافض ياخد منها المفتاح
'عمري ما كنت أتوقع أن حماتي تكون ست متسلطة بالشكل البشع دا، لدرجة أنها تدخل علينا أوضة النوم من غير أي حياء ولا حرج بحجة أنها بتصحينا، وواخدة مفتاح الشقة ولو قفلت الترباس من جوه تولع البيت حريقة وتخلي جوزي يقلب عليا، ولما طلبت منه هو يأخذ المفتاح منها لأني حاسة إنها بتفتح علينا الباب في أوقات حرجة، رفض وقعد يشرح في حكم ومواعظ وأنها والدته تعمل اللي هي عايزاة، وأنا كمان حرة وعشان كدا طلبت منه الطلاق' جاءت هذه الكلمات على لسان رحمة وهي داخل محكمة الاسرة لرفع دعوى خلع من زوجها بعد عام واحد فقط من الزواج مبررة استحالة العشرة معه.
تابعوا آخر أهل مصر على Google News
