لم تتخيل ريم بعد عام ونصف فقط من الزواج يسود الجفاف علاقتهما الزوجية، بعد أن كان يقسم لها أنه سيجعلها ملكة بعد الزواج، لينتهي بها المطاف أن تقف داخل محكمة الأسرة لرفع دعوى خلع من زوجها مبررة: "أتغير بعد الجواز، بقت معاملته كلها جفاء، مافيش كلمة حلوة، ولا مفأجاة، وقلبه بقي قاسي، رغم أني بشتغل واشقى وقاله خد المرتب كله أهم حاجة ترضى عني، لكن مقدرش كده، وكل كلامه قبل الزواج تبخر، لدرجة أني حسيت أن في حياته واحدة تانية".
روت الزوجة لـ"أهل مصر"، قصتها منذ أن تعرفت عليه قبل الزواج حيث ربطتهما علاقة عاطفية، وتزوجا بعد أن تمت خطبتهما بشهور قائلة: "كنت بشتغل في مصنع لما شافني وهو بيشتغل مع والده في محل عطارة، واتعرفنا على حب 4 شهور، لحد ما اتفقنا انه يتقدم يخطبني، في الأول كان بيقول مش هقدر على مصاريف بيت وأسرة وأنا قررت أني هساعده ومش هسيب الشغل، وفعلا اتفقنا أنه هياخد كل مرتبي بعد الجواز، وكنت فاكرة أن حبه هيغرقني وأنه هيفضل طول عمره حنين عليا، لكن يدوب تزوجنا وكل حاجة تغيرت معاملته طريقته، مبقاش يستحمل منى كلمة، طول الوقت عصبي وصوته عالي حتى قدام أهلي".
وتابعت حديثها: "بقيت أحس أني الحياة كئيبة وخاصة لما افتكر كل اللي وعدني به، وإزاي أنا عايشة كده، بياخد مرتبي ومفكرش يجيب لي هدية مرة بعد الجواز، بقي بيتعصب من أقل حاجة، اتغير مش هو اللي عرفته، كل مشكلة بيني وبين أهله ينصرهم عليا وكأني لا أعنى له شئ، لدرجة أني شكيت يكون عرف عليا واحدة ودورت في كل صفحاته على مواقع التواصل الاجتماعي ملقتش حاجة، وحاولت أتأقلم وأعيش مقدرتش وبقت تقوم خناقة لو فكرت اشتري حاجة شخصية من مرتبي".
وأكملت الزوجة: "لما حسيت أني مش قادرة أكمل، طلبت منه ننفصل بهدوء، لكن هو رفض وعمل خناقات وغلط في حقي، عشان كده مكنش قدامي غير محكمة الأسرة لرفع دعوى خلع، وتم تحديد جلسة للدعوى".
تابعوا آخر أهل مصر على Google News
