منال تطلب الخلع: "كسول حتى في حقوقي الشرعية"

'كسول بشكل بشع لدرجة أنه بيقعد فى البيت بالأسبوع ومينزلش شغل بحجة انه تعبان ومش قادر، حتى حقي الشرعى فى العلاقة الزوجية نادرا لما يسأل فيا، وبقيت أستلف من طوب الأرض عشان نأكل، وهو ولا حياة لمن تنادى، يا إما عند امه أو نايم فى البيت ولما اتكلمت مع أهله يقول لى اشتغلى وساعديه'.. جاءت هذه الكلمات على لسان منال وهى داخل جدران محكمة الأسرة لرفع دعوى خلع من زوجها بعد ٣ سنوات من الزواج مبررة استحالة العشرة معه.

3 سنوات من الزواج

قالت الزوجة فى مستهل حديثها مع 'أهل مصر': 'اتجوزت من 3 سنين جواز صالونات، وكان بيشتغل عامل باليومية، وعامل لى البحر طحينة فى فترة الخطوبة، وأننا هنتجوز حاليا فى شقة إيجار، وبعدها حياتنا هتتغير عشان هيشتغل كتير وهيحاول يحسن من ظروفنا، وصدقته ووافقت على كل حاجة بسيطة جابها فى الشقة فى مكان شعبي جدا، لكن بعد الجواز لقيت كل كلامه كذب. إنسان كسول بدرجة مش طبيعية، عايز ينام على السرير طول اليوم، والشغل بينزله بعد عناء وخناقة كبيرة بيننا، وكل ما اقوله عايزه فلوس يقول لى استلفي ولما هنزل الشغل ابقي رديهم لحد ما بقي عليا ديون لناس كتيرة وهو مش بيحس'.

رفع دعوى خلع

وتابعت حديثها: 'حتى العلاقة اللى بيننا كل شهر مرة عشان مكسل، بقيت عايشة فى جفاء عاطفي وحرمان من كل متع الحياة، ولما خلفت بنتى بقيت أحاول أحسسه بالمسئولية وان الطفلة عايزة احتياجات لكن مفيش فايدة، وروحت غضبت فى بيت أهلى، وكمان اشتكيت لوالده واتفاجت بيرد عليا ويقول لى اشتغلى وسيبك منه هو كدا، فقررت اشتغل فعلا لكن مش عشان اصرف عليه، عشان كدا طلبت منه الطلاق ورفض فذهبت إلى محكمة الأسرة لرفع دعوى خلع ومازالت الدعوى منظورة أمام القضاء'.