"مش ذنبي انى جسمى زائد بعد ولادة ابنى، على الرغم انى وزني بقى ٩٠ لكن مبقتش وزن مبالغ فيه لدرجة انى ليل ونهار جوزى يعايرنى ويتفرج على البنات فى النت عشان يقول لى انت عايزة قنبلة تفجرك شوفي البنات الرفيعة، انا مبقتش قادر أبص عليكى، وبقرف من جسمك".
"ولما طلبت منه فلوس اكشف واعمل نظام غذائي، اتحجج انى الفلوس على القد، وانى اوفر من مصروف البيت واكشف، طيب ازاى وهو بيدفع المصروف على قد الاكل وانا مش بشتغل"، جاءت هذه الكلمات على لسان سارة وهى داخل محكمة الأسرة لرفع دعوى خلع من زوجها بعد عامين من الزواج مبررة استحالة العشرة معه.
وقالت الزوجة في مستهل حديثها مع "أهل مصر": "لما اتجوزنا كان وزنى من ٦٥- ٧٠ وكان مناسب جدا، عمره ما اعترض على اى حاجة فى جسمى فى فترة الخطوبة وكان دايما يقول لى حلو، وبعد الجواز ربنا كرمنى وحملت وكنت مبسوطة جدا وهو كمان كان مبسوط وطول فترة الحمل معترضتش على اى حاجة لحد ما ولدت ابننا، واطمن عليه وبدأ فى كلامه الصعب جدا، وكان بيجرح مشاعرى، لما عايرنى انى زدت بعد الولادة وكان غصب عنى، وخاصة عشان الرضاعة، كان نفسي يحتوينى فى فترة زى ديه، لانى خرجت من الولادة حالتى النفسية صعبة عشان مسئوليات الطفل، لكن لقيت غير كدا".
وتابعت حديثها قائلة: "لقيت إنسان أنانى، بدأ يجرح مشاعرى بكلامه ويعايرنى بوزنى، واكتر كلمة صعبة لما يقول لى "انتى مش عايزة تخسي انتى عايزة قنبلة تفجرك"، لحد ما نفسيتى تعبت جدا، ومبقتش قادرة استحمل اكتر من كدا، لما بقي يسمع افلام إباحية قدامى، ويقول لى شوفي البنات الرفيعة والعود مش انتى عاملة زى الفيل".
وختمت "لحد ما طلبت منه الطلاق ورفض انه ياخد ابنه الأول وبعدين يطلقنى، عشان كدا رفعت دعوى خلع بمحكمة الأسرة وبعدها هاخد حضانة الطفل، ومازالت الدعوى منظورة أمام القضاء".
تابعوا آخر أهل مصر على Google News
