آلاء تطلب الخلع: "بتاع ستات وكسر مناخيري عشان قفشته"

'كل شوية علاقات على النت مع بنات ومطلقات، وكل ما اكتشف علاقة وأواجهه يضربنى لدرجة أنه مرة كسر مناخيري وإيدى بسبب الستات، ويقول لى أنا حر أعمل اللى عايزة وانتي آخرك تاكلى وتشربي وتربي العيال، ولو فضلتى تتخانقى كتير هجيب الستات فى البيت هنا'.. نطقت بهذه الكلمات آلاء وهى داخل محكمة الأسرة لرفع دعوى خلع من زوجها بعد مرور ٥ سنوات من الزواج مبررة استحالة العشرة معه بعد أن تسبب فى أكثر من تشوه لها.

وقالت آلاء فى حديثها مع 'أهل مصر': من أول ما اتجوزنا وأنا عرفت أنه راجل بتاع ستات، وكان عندى أمل يتغير لما يتحمل مسئولية ويبقي معاه أطفال، لأنى كنت بخاف من فكرة الطلاق جدا، ولما ربنا كرمنى بطفلين توائم فرحت جدا، وقولت دول اللى هيخلوه يعقل، لكن للأسف بقي أفظع واكتشفت من رسايل الفيس انه بيكلم ستات مطلقات وفتيات عاهرات، لحد ما قررت أتكلم معاه ولازم آخد موقف وافتكرت أنه هيقدر كلامى لكن للأسف ضربنى وشوه وشي وكسر مناخيرى، واتعالجت فترة وقررت إنى أرجع عشان أولادي.

وتابعت حديثها قائلة: لكن لما رجعت الحياة بقت أسوأ وأسوأ على طول ضرب ويكلم الستات قدام عينى ولما اتخانق انضرب قدام ولادى، لحد ما بقيت مش قادرة أستحمل أكتر من كدا وخاصة لما هددنى انه هيجيب الستات البيت وهينام معاهم على سريرى، طلبت الطلاق وهددنى لكن فعلا موتى أفضل من العيشة معاه عشان كدا رفعت دعوى خلع بمحكمة الأسرة وأنتظر أولى الجلسات.