"هبة" تطلب الخلع: "بيخوني مع جارتي المطلقة وحملت منه"

لم تتخيل "هبة" أن زوجها يخونها مع جارتهم المطلقة، وتحمل منه وتتفأجا أن زوجها سيعقد عليها ما جعلها تقف داخل محكمة الأسرة لرفع دعوى خلع من زوجها بعد ٣ سنوات من الزواج مبررة ذلك بقولها "عمري ما كنت أتخيل إني هبقى في الموقف ده فى يوم إن جوزي يستغفلني ويعمل علاقة مع جارتي المطلقة لدرجة إنها تحمل منه في الحرام ويقرر يتجوزها عليا، مقدرتش أتحمل كل الصدمات دي".

وروت الزوجة قصتها لـ" أهل مصر": "متزوجة من ٣ سنين، جواز صالونات و كانت حياتنا طبيعية ومستقرة لحد كبير وربنا رزقني بطفل منه، عمري ما شكيت فيه من أول ما اتجوزنا كنت حاسة إنه مالوش في السكة دي، لدرجة إن لينا جارة مطلقة متوقعتش إنه ممكن يكون بيكلمها أو يعرفها أساسا، لحد ما في يوم جه وصارحني بصدمة عمري إن جارتي المطلقة حامل منه بقالها شهرين، امتى وإزاي، اكتشفت إنه كان بيروح شقتها فى نص الليل يتحسب ويمارس معاها العلاقة بقاله أكثر من ٣ شهور، وعلى الرغم إنها كانت بتاخد حبوب منع حمل إلا أنها حملت عشان ربنا يكشف سترهم".

وتابعت حديثها قائلة: "وكمان بيعترف بغلطته ويطلب مني إني اتحمل جوازه منها، عشان الفضايح وابنه منها ميبقاش ابن حرام كل ده على حساب وجعي وراحتي لكن أنا مقدرتش اتحمل وقررت إني أبعد وطلبت الطلاق لكن هو رفض بحجة أنه ميقدرش يستغنى عني وعن ابنه، لكن أنا صممت ورفعت دعوى خلع ومازالت الدعوى منظورة أمام القضاء".