"عايشة في بيت أهله من يوم ما اتجوزنا بناءا على طلبه، لأن والدته قاعدة لوحدها ومحدش بيؤنسها بعد اخواته البنات ما اتجوزوا، وانا وافقت وكنت ساكنة في شقة في الدور اللي فوقيها، وبخدمها وأساعدها في كل طلباتها عشان متعملش معايا مشاكل لكن كانت بتخترع أسباب عشان الخناق، ولازم كل صبح تتخانق معايا بحجة إني فاتحة الموتور وهيبوظ، وهي في الأساس بتتضايق لما تحس ان حصل علاقة بيني وبين جوزي بس ما بتقولهاش صريحة، لدرجة إنها ممكن تبات معانا".. جاءت هذه الكلمات على لسان دينا وهي داخل محكمة الأسرة لرفع دعوى خلع من زوجها بعد 10 شهور من الزواج مبررة استحالة العشرة معه.
وروت الزوجة قصتها لـ"أهل مصر" قائلة: من يوم ما دخلت بيت حماتي في فرحي وأنا حاسة إنها مش بتحبني، وبتغير على ابنها جدا وهو بيسمع كلامها في كل حاجة حتى لو على راحته، وعشان كدا قررت اتعامل معاها بالحسنى عشان تحبني، لكن هي كانت قاسية وحما بمعنى الكلمة تتخانق على كل حاجة، وخاصة الاستحمام بتتعصب اوي لما تسال عليا وتعرف اني بستحمى، وخاصة لو كان بالليل أو الصبح عشان بتخمن إن حصل علاقة بيني وبين جوزي، وتتخانق ان الموتور بتاع المياه هيبوظ، وبصوت عالي لحد ما الجيران تسمع وكمان تلميحاتها على العلاقة بيني وبين جوزي صعبة جدا.
وتابعت حديثها قائلة: كنت بتحمل على أمل إن جوزي يتكلم معاها في الموضوع لكن للاسف خاف على زعلها، وهي بدأت تزيد في المعاملة السيئة لي لدرجة إنها بدأت تشتمني، وتتكلم بأسلوب مش كويس، وطلبت من جوزي يجيب شقة بعيد رفض، سبت له البيت وطلبت الطلاق لكن قرر يعاقبنى هو وامه ويسبوني زي البيت الوقف عشان كدا رفعت دعوى خلع بمحكمة الأسرة وانتظر أولى الجلسات.
تابعوا آخر أهل مصر على Google News
