جهاد تطلب الخلع: "ضرب أبويا قدام الرجالة على القهوة"

"كانت خناقة بيننا فى شقتنا، بسبب شرب المخدرات والسهر والضرب فيا كل شوية، لحد ما سبت البيت ومشيت ورفضت ارجعله، وراح لوالدى على القهوة واتخانق معاه، وضربه قدام كل الرجالة فى القهوة"، جاءت هذه الكلمات على لسان جهاد وهي داخل جدران محكمة الأسرة لرفع دعوى خلع من زوجها بعد عامين من الزواج مبررة استحالة العشرة معه.

وروت الزوجة قصتها لـ "أهل مصر" قائلة: "من أول ما اتجوزت وأنا اكتشفت انه بيشرب مخدرات، وفكرت إني اسيبه لحد قررت أحاول أكمل معاه بسبب الحمل، وتحملت على أمل إن ربنا يهديه، لكن للأسف زاد فى السهر والشرب لحد ما باع الذهب كله والعفش بسبب المخدرات، وكان بيضربنى كل ما يخلص فلوس، لدرجة انى فتح دماغى قبل كده عشان انزل اجيب فلوس من عند أهلي، وسبتله البيت ومشيت وطلبت منه الطلاق، لكنه رفض واتهجم عليا لحد ما الجيران وصلوني لبيت أهلى".

وتابعت حديثها قائلة: "لكن هو بقي يتخانق معانا عشان ارجعله، وأنا رفضت ارجع معاه أبدًا، لكن هو راح لأبويا على القهوة واتخانق معاه وشد الخلاف بينهم، والناس ادخلت لكن جوزى المخدرات ضيعت مخه وضرب أبويا قدام الناس كلها، عشان كدا صممت على الطلاق ورفعت دعوى خلع ومازالت الدعوى منظورة أمام القضاء".