ولاء تطلب الخلع: "بيكلم بنات ويوصف لهم جسمي"

'مش قادر يتوب ويبقى إنسان نضيف، على طول علاقاته النسائية مالهاش عدد، وكنت بدعيله بالهداية ومرة اغضب ومرة اتخانق عشان يبطل ويوعدني ويرجع تاني، لكن لما توصل بيه الجرأة أنه يكلم بنات ويوصف لهم جسمي بمنتهى البجاحة ويتريق عليا وعلى تفاصيل جسمي مع البنات على الشات مش هسكت'، جاءت هذه الكلمات على لسان ولاء وهي داخل محكمة الأسرة لرفع دعوى خلع من زوجها بعد ٣ سنوات من الزواج مبررة استحالة العشرة معه.

3 سنين جواز

قالت الزوجة في مستهل حديثها مع 'أهل مصر': 'أنا اتجوزت من ٣ سنين جواز صالونات، وعلى الرغم من عيوبه كنت راضية وبحمد ربنا على حالته المادية المتوسطة وشقة إيجار ومكنتش معترضة ولا بشكى لكن بعد ما اتجوزت اتفاجئت أنه بتاع ستات، ومهما يحلف أنه مش هيعمل كده بيرجع تاني في يومين، لحد ما فقدت الثقة فيه، وكنت بدعي له بالهداية، ومرات كنت بتخانق معاه، وهكذا يوعد ويخلف ويرجع تاني للستات'.

رفع دعوى خلع

وتابعت حديثها قائلة: 'لكن اللي مقدرتش أتحمله لما شوفت الشات وهو بيتكلم مع البنات عليا، ويوصف ليهم أدق تفاصيل جسمي، ويتريق عليا معاهم حتى عوراتي بيوصفها مع العاهرات اللي يعرفهم، اتخانقت معاه لكن المرة ده غير أي خناقة وقررت أطلق ورفض عشان كده رفعت دعوى خلع ومنتظرة أولى الجلسات'.