تقدمت ندى.س.أ بدعوى قضائية أمام محكمة الأسرة بزنانيري تستغيث بالقضاء لرفع دعوى خلع من زوجها بعد عام من الزواج، مبررة ذلك بقولها: "خدعني وطلع مش راجل بعد سنة من جوازنا ووقوفي معاه فى كل حاجة وساعدته حتى الشبكة أنا اللى دفعت فلوسها من ورا أهلى، عشان حالته المادية مكتتش ميسورة وحب ليه كان عميني، فى النهاية غدر بيا وسرق دهبي اللى يعدى ١٠٠ الف جنية، اشتريته بورث والدى واخده واتجوز بيه واحده وفص ملح وداب من يومها بقاله 5 شهور مختفي".
وقالت ندى فى مستهل حديثها مع " أهل مصر" : "أنا من أول والدي ما توفي وكنت منهارة جدا، ولقيته هو ظهر فى حياتى فجأة وكان تعارف عادي فى البداية عن طريق واحدة اعرفها معرفة سطحية، وبدأ يهتم بيا ويسأل عليا لدرجة إنه يكلمنى مرتين فى اليوم وعرف يخرجنى من حزنى على والدى، وحسيت إنه ممكن فعلا يكون شخص كويس ويحتوينى وحبيته على الرغم من ظروفه المادية ومستواه الاجتماعى أقل مننا بكتير؛ لكن قررت أقف جنبه وأساعده عشان يتقدم وكل حاجة جبتها من وراء أهلى حتى الدهب اشتريته بفلوس ورثي وكبرته قدام الكل، واتقدم فعلا وهو رسم ليا كل أنواع الحب وانا كنت طايرة فى السما".
وتابعت ندى : "لحد ما فوقت على واقع مرير بعد سنة قضاها معايا وأنا اللى متحملة كل المصاريف حتى السفر؛ على الرغم من ضيقتي إنه اعتمد علياوأنا ما حاولتش أظهر دا عشان ميضايقش، لحد ما صحيت فى يوم لقيته سايب ورقة فيها وقت سعيد قضيته معاكى ودهبي أنا أخدته، عشان بصراحة هاتجوز بيه حب عمري".
وأضافت متأثرة: "كانت كلماته نار ليا والدهب اللى بيقول بتاعه دا بتاعي وورث والدي، ورفعت عليه قضية سرقة لكنه فص ملح وداب لحد ما يأست وقررت أرفع دعوى خلع ومنتظرة أولى الجلسات".
تابعوا آخر أهل مصر على Google News
