"على أتفه الخلافات يعاقبنى بالهجر فى الفراش، يعنى لو اشتريت حاجة فى البيت من غير ما أقوله تبقي مشكلة كبيرة ويتخانق ويعلى صوته وتوصل لدرجة الهجر فى الفراش لمدة شهور من غير ما يحس بيا، دا غير معاملته الجافة عمره ما قالى كلمة حلوة جاف المشاعر، كل اللى همه طلباته وبس، أحيانا كنت بحس انى خدامة وبس".. جاءت هذه الكلمات على لسان نسمة وهى داخل محكمة الأسرة لرفع دعوى خلع من زوجها بعد عامين من الزواج مبررة استحالة العشرة معه.
وقالت الزوجة في مستهل حديثها مع "أهل مصر": أنا غلطتى من البداية انى كان نفسي اتجوز وخلاص مش مشكلة المواصفات مفكرتش كويس وخاصة انى سنى كان صغير مكملتش 20 سنة، وأخدتنى فرحة الفستان والفرح، لكن فوقت على كارثة لما لقيت راجل قماص على كل حاجة ومش رومانسي، بيتخانق على أتفه الأسباب، كنت بتحمله فى البداية وأقول بكرة يتغير وربنا يهديه لكن مافيش فايدة على طول عصبي وصوته عالى ومش بس كدا، دا وصلت معاه انه يهجرنى فى الفراش بالشهور، والمعاملة بتبقي أسوأ ما يمكن.
وتابعت حديثها قائلة: "لحد آخر خناقة بيننا كانت عشان اشتريت طلبات للبيت وأنا راجعة من عند والدتى من غير ما أقوله، وطبعا هو لازم يعرف كل كبيرة وصغيرة فى البيت حتى الخزين اللى فى التلاجة ولو جاية من بره لازم يفتش الأكياس واكتشف انى اشتريت حاجة من غير ما أقوله واتعصب وعمل خناقة كبيرة معايا وشتمنى وبقاله دلوقتى 6 شهور هاجرنى فى الفراش على الرغم انى اتأسفت كتير لكن مفيش فايدة، وأنا خايفة ألا أقيم حدود الله، عشان كدا رفعت دعوى خلع ومنتظرة أولى الجلسات.
تابعوا آخر أهل مصر على Google News
