"معرفش ذنبي أيه أن بطني كبرت نتيجة الحمل، ما هي حاجة طبيعية لكل الستات، لكن بمجرد ما وصلت الشهر الخامس وهو مش طايقني حتى العلاقة الزوجية امتنع عنها نهائيا معايا، وكل ما أتكلم معاه يقول لي: شكل بطنك بقى بشع مش طايق أبصلك، شوفي الستات مش أنتِ اللي مستعجلة على الحمل، لحد ما بقيتي زي الكورة، بصراحة مش طايقك، كنت مستغربة أزاي بيقول كده بدل ما يقف جنبي لحد ما قالي أنا متجوزك عشان أبسط نفسي مش ألبس في عيال من أول كام شهر"، جاءت هذه الكلمات على لسان شيرين، وهي داخل محكمة الأسرة لرفع دعوى خلع من زوجها بعد 9 شهور من الزواج مبررة استحالة العشرة معه.
وروت الزوجة قصتها لـ "أهل مصر"، قائلة: "أنا اتجوزت من 9 شهور بس، اتقدم ليا لما شافني في شغل والحمدلله أنا على قدر عال جدا من الجمال، عشان كدا أول ما شافني اتقدم على طول عشان يخطبني، كنت فاكرة أنه بيحبني وبيقدرني وعايز يكون بيت وأسرة وحياة مستقرة، لكن اتفاجئت أنه متجوزني عشان شكلي وبس ومش عايز أي حاجة تاني، ودا ظهر لما عرف أني حامل بعد الجواز اتعصب وطلب مني أنزله وأننا لسه في بداية جوازنا نستنى شوية، لكن أنا رفضت وأصريت أكمل الحمل، ومن أول ما بطني بدأت تكبر وهو بدأ يتغير معايا وأسلوبه بقى صعب جدا وطول الوقت بيتنمر عليا".
وتابعت: "بقى يقول شكلك مستفز، بقيتي وحشة وشكلك مش حلو، وبقى يقارني بكل الستات اللي نعرفهم، وكمان ابتعد عني في العلاقة الزوجية نهائيا، واكتشفت من شهر أنه بيخوني مع واحدة كان يعرفها قبل ما نتجوز ولما واجهته قالي هتسلى لحد ما ربنا يكرمك وترجعي زي ما كنتي لكن بكرشك ده استحالة أقرب منك، بقيت بكره أشوفه قدامي من كلامه السخيف وتصرفاته الغير منطقية، وقررت أنفصل وأخليه مخلوع مش هو اللي يطلق ورفعت عليه دعوى خلع بمحكمة الأسرة ومازالت الدعوى منظورة أمام القضاء".
تابعوا آخر أهل مصر على Google News
