لمياء تطلب الخلع: "طردني في الشارع واتجوز عليا بعد ما ساعدته ووقفت جنبه"

تجلس لمياء على إحدى مقاعد محكمة الأسرة بشمال الجيزة تنتظر دورها فى الدخول إلى قاعة المحكمة لنظر الدعوى التي رفعتها ضد زوجها بعد 6 سنوات من الزواج مبررة ذلك بقولها" اتجوزته وهو كان على قد حالة وساعدته عشان يعمل مشروع ويقف على رجله بعد ما خلفت منه طفلة، وبقت حالته المادية ميسورة وربنا فتح له الأبواب واول حد جه أنا وراح يتجوز عليا ولما وافقت فى وشه ورفضت راح طردنى من البيت، وبقاله ٦ شهور مشفش بنته".

وقالت الزوجة في مستهل حديثها مع " أهل مصر": اتجوزت من 6 سنوات جواز صالونات عن طريق الأهل ولما شوفته حسيت براحة رغم أنه الكل قال حالته المادية أقل من المتوسط، لكن قررت أوافق عليه واتحمل ظروفه وأسانده فى مشروع وفعلا فتح مشروع ووقفت جنبه وربنا كرمه من وسع وأشترى عربية وبدأ يشوف نفسه، لدرجة أنه بقي يسهر كتير، ويخرج مع أصحابه وبدأ يهملنا انا وبنته فى البيت، على الرغم إنى كانت كل طلباته مجابة ومقصرتش في حاجة، لكن كنت ديما بحس انه بيبعد عنى ودا كان قلقنى جدا.

وتابعت حديثها قائلة: لحد ما هو قال كل حاجة بجراءة وقالى أنه هيتجوز، ورفضت وكانت صدمتى لما قالى "أنا هتجوز بيك أو غصب عنك عايزة تقعدى اتفضلي مش عايزة مع الف سلامة لكن أنا هتجوز فى نفس البيت "، وأنا رفضت أنه يتجوز وقولتله مش هسيب بيتى، لكن هو اتجرأ وطردني من الشقة عشان كدا رفعت دعوى خلع ومازالت الدعوى منظورة أمام القضاء.