دعاء تطلب الخلع: "أجوز عليا عرفي بعد ما وقفت جنبه واديلته فلوسي"

"لما اتجوزنا واجهتنا مشاكل في الخلفة وكانت بسببه، والدكتور أكد أنه بيعاني من مشكلة هتاخر الحمل شوية، ومعترضتش ووقفت جنبه لحد ما شاء القدر إنه يعمل حادثة وتأثر على رجله ميقدرش يمشي ومحتاج عمليه، وقفت جنبه وبعت جزء ميراثي وعملته العملية ومشروع كمان، وبدل ما يرد الجميع راح اتجوز عليا عرفي".. بهذه الكلمات تحدثت "دعاء"، وهى داخل محكمة الأسرة لرفع دعوى خلع من زوجها بعد 4 سنوات من الزواج مبررة استحالة العشرة معه.

وروت الزوجة قصتها لـ"أهل مصر" قائلة: "اتجوزت من 4 سنين من شاب أقل مني بكتير في المستوى المادي والإجتماعي، ودا لأنه كان زميلي في الشغل واتعلقت بيه، ووالدتى اقنعت والدى وأهلى إنهم يوفقوا عليه لأنها مش بترفض ليا طلب، ووافقوا فعلا ووالدتى ساعدته في تجهيز الشقة والجوازه، من وراء والدي عشان تفرحني، واتجوزنا وكانت الحياة بينا مستقرة؛ وكل اللي يطلبه يلاقية لكن شاء القدر إنه مخلفش منه بسبب مشكلة عنده، وكنت واقفة معاه وسانده وأقوله " مش مشكلة خلينا مع العلاج "، لحد ما مرة عمل حادثة واتصاب في رجله وأثرت عليه في المشي.

وتابعت حديثها: احتاج لعملية عشان يمشي مرة تاني وبدون أي تردد اتنازلت عن جزء من ورثي ووقفت قدام أهلي وعملته العملية وخف ورجع يمشي تاني، وكنت طايرة من السعادة لكن هو بدأ يتغير معايا لحد ما عرفت إنه متجوز عرفي من واحدة عاهرة عرفها، وكنت هاموت واتخانقت معاه وهو بدل ما يعتذر على صوته عليا، فطردته من شقتى لأني الشقة بتاعت والدى هو اللى كتبها بإسمي يوم فرحى واتجوزت فيها، عشان كدا رفعت دعوى خلع ومازالت الدعوى منظورة أمام القضاء.