وفاء تطلب الخلع: "بعد سنة جواز بيقول لى انتى مش بنت بنوت"

"بعد سنة من جوازنا وعايشين مع بعض، واتجوزني بكر وربنا شاهد على كدا، جوزى بيطعن في شرفي قدام الناس ويقول إني مكنتش بكر لما اتجوزني وهو ستر عليا عشان الفضايح، وبيعمل دا كله عشان رفضت ابيع دهبي ويشرب بيه حشيش" جاءت هذه الكلمات على لسان "وفاء" وهي داخل محكمة الأسرة لرفع دعوى خلع من زوجها بعد عام فقط من الزواج مبررة استحالة العشرة معه بعد أن تحدث عن شرفها أمام الأهل والأغراب.

روت الزوجة قصتها لـ"أهل مصر" قائلة: "اتجوزت من سنة واحدة كان جواز صالونات، وكانت فترة الخطوبة عادية زي أي اتنين مخطوبين لسه مش عرفوا عيوب بعض، لكن كل حاجة ظهرت بعد الجواز لما عرفت أنه بيشرب وكمان ليه علاقات نسائية، وكنت بتخانق معاه بينى وبينه من غير ما حد يعرف من أهلنا عشان كنت عايزة أعيش ومبقاش مطلقة، لكن هو بقي يتخانق على كل حاجة وطول الوقت عايز يبيع حاجات عشان يجيب حشيش ويسهر مع أصحابه، وأنا كنت برفض حتى لو موتنى من الضرب، كنت فعليا عايشة في جحيم.

وتابعت حديثها: "بتحمل وقول الأيام تعدى واخلف وربنا يهديه، لحد ما طلب دهبي بحجة أنه هيفتح مشروع وعايز يبيعه، فرفضت لأني متأكدة أنه هيضيع فلوسهم على مزاجه، وكانت خناقة كبيرة وسبني في الشارع بأبشع الألفاظ ، لدرجة اتهمني في عرضي وقال إنى يوم فرحى مكنتش بنت، وهو اللي ستر عليا وكذب وأقسم يمين وهو عارف إنه كذاب وفضحنى عشان كدا برضوا رفضت أديله الدهب ، ورفعت عليه دعوى خلع ومازالت الدعوى منظورة أمام القضاء.