"طفح بى الكيل من جوزى متجوزنى وهو شايف مناخيرى ومحدش أجبره عشان يتجوزنى ويجى يتقدم ليا لحد البيت، عشان يعيب على مناخيري كل يوم، ويقارنى بكل ستات الدنيا، على الرغم أنى عمرى ما حد قال حاجة عليها وشايفة طبيعية لكن هو قليل الذوق لدرجة يقول مناخيرك كبيرة أوى، وصلنى لدرجة أني كرهت أبص فى مراية أو اقعد مع حد"، نطقت بهذه الكلمات مريم وهى داخل محكمة الأسرة لرفع دعوى خلع من زوجها بعد عام و11 شهرا فقط من الزواج مبررة استحالة العيش معه تحت سقف بيت واحد.
وقالت الزوجة فى مستهل حديثها مع "أهل مصر": "أنا اتجوزت من سنة و11 شهرا زواج صالونات، ودا أكبر دليل أنه هو اللى اختارنى واتقدم ليا ودخل من الباب، وأنا لما شوفته وافقت لأنه كان شخص مناسب من وجهة نظرى، وفعلا اتجوزنا وكانت الحياة فى البداية بيننا كلها احترام لحد ما فاجأة بدأ يتغير ويتنمر عليا ودى كانت صدمتى لما بدأ يعلق على مناخيرى ويقول لى مناخيرك كبيرة وشكلها مش لطيف بصى الست دى حلوة أزاى، اتكسفت جدا وحاولت أوصله انه مينفعش يقول لى كدا، لكن هو استمر فى كدا، لدرجة وصلنى أنى بكره الساعة اللى بيجى فيها البيت عشان يتريق عليا".
وتابعت حديثها قائلة: "كنت بموت من كلامه واستفزازه ليا لدرجة أنى كرهت نفسي بقيت أحس بالنقص حتى المراية مش ببص فيها بسبب كلامه ولا اتعزم أو اخرج مع حد، وصلت لمرحلة الاكتئاب لحد ما قررت أحكى مع صحبتى أخصائية نقسية وقررت تساعدنى وفعلا قدرت أخرج من حالتى شوية وكان أول قرار لعلاجى أنه مكملش معاه، وطلبت منه الطلاق لكن رفض خايف أطلب حقوقى، عشان كدا رفعت دعوى خلع ومازالت الدعوى منظورة أمام القضاء".
تابعوا آخر أهل مصر على Google News
