أمل تطلب الخلع: فاجأني انه هيتجوز 3 غيري ومش حافظ من القرآن غير مثنى وثلاث

لم تتخيل أمل البالغة من العمر 27 عاما فقط أن زوجها بعد عامين فقط من الزواج سيخبرها أنه سيتزوج عليها وأنه يحب التعدد ومن أحلامه أن يتزوج أربع نساء، لترفض هى وعندما يصمم على عدم تطليقها والزواج من أخرى تقف داخل محكمة الأسرة لرفع دعوى خلع من زوجها بعد عامين فقط من الزواج مبررة ذلك بقولها "مش حافظ حاجة من القرآن غير مثنى وثلاث ورباع، على الرغم ان ظروفه المادية متوسطة وبدل ما يفكر فى ابنه اللى عنده سنة وازاى نربيه صح رايح يتجوز ولما طلبت منه الطلاق عمل نفسه مش سامعنى.

وقالت الزوجة في مستهل حديثها مع "أهل مصر": أنا اتجوزت من سنتين جواز صالونات، والحمدلله كنت راضية بعيشتى مع جوزى والحياة مستقرة بيننا وربنا كرمنى منه بطفل، وكنت بحلم انه يتربي وسطنا فى عائلة مستقرة، لكن جوزى من شهرين قلب حياتنا لجحيم لما قرر يتجوز تانى وبيقول لى انه كل سنتين هيجيب واحدة لحد ما يكمل أربعة عشان بيحب التعدد ونفسه يحقق حلمه انه يكون متجوز من 4 ستات، كنت فى الأول بفكره بيهرج لحد ما بقي كل يوم يفتح الموضوع وسمعت انه بدأ يشوف عرايس عشان يختار واحدة مناسبة ليه، وهنا بقي واجهته وقولتله انى مش هقبل انه يتزوج عليا ولو هو مصمم يطلقنى.

وتابعت حديثها قائلة: لكن هو عمل نفسه مش سامع، وفى الآخر قال لى طلاق مش هطلق، لكن أنا رفضت انه يتجوز عليا ورفعت عليه دعوى خلع ومازالت الدعوى منظورة أمام القضاء.