"من يوم ما اتجوزنا وهو تعب أعصابي بسبب الشك والغيرة اللى عنده، لدرجة إنه بيتخيل إني بخونه مع كل راجل فى المنطقة، ويضربني وبعدها يرجع يعتذر ويتأسف وإنه غصب عنه، وأنا كنت بسامحه وأقول ده مرض مش بإيده حاجة، لحد ما الوضع زاد عن حده وبقى يشتمنى بسبب تخيلات مريضة فى دماغه وطفح بي الكيل من كل تصرفاته". نطقت بهذه الكلمات علياء وهى داخل محكمة الأسرة بزنانيري، لرفع دعوى خلع من زوجها بعد 3 سنوات من الزواج مبررة استحالة العشرة معه.
وقالت الزوجة فى مستهل حديثها مع «أهل مصر»: "أنا اتجوزت من 3 سنين جواز تقليدي، وكنت مرتاحة ليه جدا فى بداية الخطوبة، لحد ما بدأ يسألنى عن كل حاجة وأخد الأرقام السرية للفيس بوك والتليجرام، وكنت بحسه بيشك فيا لكن اللى حواليا أقنعنونى إنها غيرة عادية، وكل الشباب بيعملوا كدة في أول الخطوبة، لكن بعد الجواز هيتغير مش هيبقى فاضي يرن عليكي، وأنا للأسف اقنعنت بكلامهم لحد ما تم الجواز، واكتشفت إني كنت غبية جدا لما سمعت كلامهم، لأنها مش غيرة ده طلع مريض بالوسواس القهري، بيشك في كل حاجة حتى أمه وأهله، وطبعا أنا أكتر واحدة بيشك فيها، على الرغم إني الكل بيحلف بأخلاقي ولبسي المحترم، لكن هو كلامه كله شك لحد ما بقى فعلا يتهمني إني بخونه مع حد من شباب المنطقة، ويرسم أوهام فى دماغه مالهاش أي أساس من الصحة، وممكن لو اندمج مع تخيلاته يفضل يضرب فيا بالساعة لحد ما يفوق لنفسه، ويفضل يعتذر ويبوس دماغي عشان أسامحه".
وتابعت حديثها قائلة: "كنت بلتمس ليه العذر وأسامحه، وأطلب منه إنه لازم يتعالج لإن الحالة بدأت تزيد عنده، وكان يوعدنى ويخلف، لحد ما بقيت عايشة فى جحيم بسببه، لدرجة إني كنت بدعي ربنا مخلفش منه، لإنه مينفعش يكون أب أبدا، وطلبت منه يطلقني أفضل من الفضايح كل يوم لكنه رفض، عشان كدة رفعت دعوى خلع بعد 3 سنين جحيم وأنتظر أولى الجلسات
تابعوا آخر أهل مصر على Google News
