صابرين تطلب الخلع: جوزي بيدعي عليا أموت عشان حامل فى بنت

"مش عارفه بيعاقبنى على ايه ويشترط على رزق ربنا إنه يكون ولد، ربنا أراد إني أحمل فى بنت ومن أول ما عرف هو وأمه بقوا يدعوا عليا أنزلها، وهو يقول لى "يارب يجيلك تسمم حمل وتريحنا انتى وهى"، غير أمه اللى طحنتني فى شغل البيت عشان أنزل الطفلة"، نطقت بهذه الكلمات صابرين أمام محكمة الأسرة لرفع دعوى خلع من زوجها بعد عام واحد فقط من الزوج، مبررة استحالة العشرة معه بعد أن يتمنى وفاة ابنته وهي فى رحم أمها بسبب كرهه الشديد للفتيات.

وروت الزوجة قصتها لـ"أهل مصر"، قائلة: "عمرى فى حياتي ما شوفت ناس زى جوزي وأهله وكرههم للبنات بالشكل دا، وللأسف معرفتش الكلام دا غير لما حملت بعد الجواز، وكان قلقان يعرف نوع الجنين وأول ما عرف إنها بنت اتغير عليا فى المعاملة، وبقى عصبي وعنيف جدا معايا، لدرجة إنه يفضل يدعى عليا بتسمم حمل أو إجهاض وأنزل البنت لأنه خايف من اللى كان بيعمله زمان فى بنات الناس وضحكه عليهم باسم الحب والغراميات يحصل مع بنته، وحماتى بقت تزود عليا شغل البيت كله، لدرجة إنى كنت بدوخ واقع من كتر التعب، وجوزى بالنسبة ليه عادى جدا ولا كان حاسس بيا.

وتابعت حديثها: "فضلت اتحمل على أمل إن ربنا يهديهم ويعاملونى كويس لكن مافيش فايدة بقي يكرهوني أنا واللى فى بطنى والتى لا حول لها ولا قوة، لحد ما طفح بي الكيل من الهم والحزن والأنيميا زادت من قلة الأكل وشغل البيت، عشان كدا طلبت منه الطلاق ورفض مالقتش قدامى غير دعوى الخلع عن طريق محكمة الأسرة ومنتظرة أولى الجلسات".