"استحالة تكون إنسانة أو زوجة أقدر أكمل معاها حياتي، فعلا معرفتش أختار وصدمتى لما عرفت من زميله ليها أن فى علاقة بينها وزميل ليهم فى الشغل متجوز وبينهم مكالمات تليفون ورسايل، ورفضت أصدق كلام زميلتها من غير دليل، لكن قررت أنى أراقب كل تحركاتها من غير ما تحس وفعلا اكتشفت أنهم بيطلعوا من الشغل وبيقعدوا فى مكان بره قبل ما ترجع البيت، ونزلت نسخة واتس على موبيلى لرقمها من غير ما تعرف اكتشفت أنها متفقة معاه على الجواز لما تتطلق منى، وتأخد كل حقوقها".. نطق بهذه الكلمات مصطفى وهو داخل محكمة الاسرة لرفع دعوى نشوز ضد زوجته بعد 3 سنوات من الزواج.
وقال الزوج فى مستهل حديثه مع "أهل مصر": أنا اتجوزت من 3 سنين جواز صالونات، وكان عجبنى فيها احترامها وأخلاقها اللى كانت بتمثلهم عليا، وكنت بضرب بيها المثل أمام كل أهلى، لكن خذلتنى وطلعت أسوأ إنسانة عرفتها فى حياتى، ربنا أراد أننا نتأخر شوية فى موضوع الحمل، وكشفت عليها أكتر من مرة والدكتور قال مسألة وقت فقط، وعلى الرغم من كدا مكنتش بقبل حد يتكلم عليها أى كلمة أو يفتح موضوع الخلفة قدامها عشان متزعلش، لكن هى ردت دا كله عليا بالخيانة والغدر واتعرفت على راجل وهى على ذمتى، وكمان اتفقت معاه على الجواز لما تتطلق منى، وياريت رسمى دول اتفقوا على عقد عرفي مؤقت لحد ما ظروفه تتحسن ويقول لمراته.
وتابع حديثه قائلا: "هو كمان متجوز والاتنين خاينين زى بعض، وطبعا أنا مكنتش عارف حاجة من دا كله، الحوار كان بيتم من وراء ضهرى لحد ما زميلة ليها قررت تقول لى لما لقت مراتى ماشية فى الموضوع بجد، وفعلا هى كانت متغيرة وبتكرهنى فيها عشان أطلقها، لكن كنت بخمن أنها مضايقة من حاجة فى الفترة الأخيرة، ولما راقبتها فعلا لقيت رسايل بينها وبين زميلها، واتفاقهم على الجواز لما تخلينى أطلقها بإرادتى عشان تاخد كل حقوقها، وكمان علاقتهم بقالها أكتر من 5 شهور مع بعض، ولما واجهتها قالت أنها مش قادرة تحبنى وبكل جرأة بتطلب حقوقها كاملة حتى القايمة اللى مجبتش منها حاجة عشان أنا اللى فرشت الشقة بسبب ظروفها المادية، فقررت أرفع عليها دعوى نشوز بمحكمة الأسرة ومازالت الدعوى منظورة أمام القضاء.
تابعوا آخر أهل مصر على Google News
