"كان مفهمنى أن مراته الأولى مش هترجع وأن الحياة بينهم مستحيلة والطلاق الرسمى مسألة وقت عشان أولادهم، وعشمنى بالحب وحسسنى أني كل حياته وأنه كان بيدور على إنسانه تعرف تقدر مشاعره، وأنا طبعا صدقته وكنت أتجوزت قبل كدا واتطلقت ومش معايا أطفال لكن هو كان عارف أنى معايا فلوس وقررت أساعده عشان نفتح بيتنا، لكن اتفاجت بعد جوازنا أنه بيشتغل يوم وعشرة لأ، وبياخد منى فلوس لمراته الأولى".. نطقت بهذه الكلمات غادة وهى داخل محكمة الأسرة لرفع دعوى خلع من زوجها بعد عامين من الزواج مبررة استحالة العشرة معه.
وروت الزوجة قصتها لـ"أهل مصر" قائلة: "كنت متجوزة قبل كدا ومكملتش معاه لأنه كان بيشرب وبيعرف ستات عليا، ومخلفتش منه وبعد طلاقى بسنة واحدة والدى توفى ومافيش غيرى ترك ليا ورث كبير وفلوس فى البنك، وكان نفسي أتجوز وأعيش حياة مستقرة زى أى واحدة وقررت أنزل الشغل وهناك اتعرفت على شاب وكان زميل فى البداية لحد ما بقينا أصحاب وبدأ يتكلم معايا فى كل حاجة ويقرب منى وقالى أنه متجوز لكن مش مبسوط مع مراته وسايب البيت بقاله أكتر من سنة وانه هيطلقها لما العيال يكبروا شوية".
وتابعت غادة حديثها: "لما أتكلمنا مع بعض حسيت بالإعجاب وهو كمان بادلنى بشعورى دا واتفقنا على الجواز على أساس أنه هيطلق مراته فى أقرب فرصة ، لكن بعد الجواز ومساعدتى ليه فى كل حاجة تقريبا مدفعش مليم واحد فى الجواز، واكتشفت أن مراته عايشة معاه على ذمته عادي وكل الفلوس اللى بياخدها منى بيصرفها عليها وعلى أولاده وهى عارفه وموافقة يعنى أنا بصرف على الاتنين، ولما واجهته قالى احمدى ربنا أنى وافقت عليكى، انتى خاطفة رجالة لو ست محترمة مكنتيش تفكرى فى واحد متجوز.
وأكملت، ولما طلبت منه أنه يطلقنى ساومنى على فلوس وظهر على وشه الحقيقى وهددنى بصور ليا بملابس البيت، فقررت أرفع دعوى خلع بمحكمة الأسرة ومنتظرة أولى الجلسات.
تابعوا آخر أهل مصر على Google News
